Aksidentet me makina, dëmshpërblimet rriten 25% – Janar-nëntor 2021, kompanitë e sigurimeve kanë paguar 36 milionë dollarë dëme

Heqja e kufizimeve të lëvizjes së mjeteve veccanërisht gjatë sezonin veror ka rritur dukshëm numrin e aksidenteve, por edhe të dëmshpërblimeve që kompanitë e sigurimeve kanë paguar për shkak të tyre. Autoriteti I Mbikqyrjes Financiare raporton se kompanitë e sigurimeve kanë paguar në total rreth 36 milionë dollarë dëmshpërblime për periudhën janar nëntor, me një rritje të fortë krahasuar me një vit më parë.

Sipas të dhënave zyrtare të Autoritetit, dëmet e paguara bruto në sigurimin motorik për periudhën janar-nëntor 2021 kapën vlerën 3,6 miliardë lekë, duke pësuar një rritje me rreth 25.35% krahasuar me të njëjtën periudhë të një viti më parë.

Rritja e dëmshpërblimeve të paguara për shkak të aksidenteve vjen në një ccast kur dëmet në tërësi, përfshi ato të pronës apo shëndetit, kanë shënuar rënie të theksuar në raport me një vit më parë.

Gjatë periudhës janar-nëntor 2021, dëmet e paguara bruto në tregun e sigurimeve, arritën në rreth 6 miliardë lekë, afërsisht 60 milionë dollarë, ose 11.88% më pak se në periudhën janar-nëntor 2020. AMF analizon se rënia është ndikuar kryesisht nga pagesa e pjesës më të madhe të dëmshpërblimeve për tërmetet e fund vitit 2019 gjatë vitit të kaluar.

Ndërkaq, paralelisht me dëmet e paguara, rritje kanë shënuar edhe arkëtimet e kompanive nga sigurimet e mjeteve.

Primet e sigurimit të detyrueshëm motorik, gjatë periudhës janar-nëntor 2021 arritën rreth 10 miliardë lekë, afërsisht 100 milionë dollarë, ose 13.71 % më shumë se në periudhën janar-nëntor 2020.

Produkti MTPL e brendshme, në periudhën janar-nëntor 2021, pati një rritje prej 9.05% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 11.16% krahasuar me të njëjtën periudhë të një viti më parë.

Produkti Karton Jeshil në periudhën janar-nëntor 2021 pati një rritje prej 30.35% të vëllimit të primeve të shkruara bruto. Kjo u shoqërua nga një rritje të numrit të kontratave prej 62.71% krahasuar me periudhën janar-nëntor 2020.

Produkti Sigurim Kufitar, në periudhën janar-nëntor 2021, pati një rritje 132.07% të vëllimit të primeve të shkruara bruto krahasuar me periudhën janar-nëntor 2020. Edhe numri i kontratave u rrit me 158.47%.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.