Aksidentet me makina, dëmshpërblimet rritje 51% / Janar-Qershor, 20 Milionë dollarë dëmet e paguara nga kompanitë e sigurimit për automjetet

Numri i lartë i aksidenteve të shënuara përgjatë këtij viti është reflektuar edhe në treguesit e kompanive të sigurimit. Autoriteti i Mbikëqyrjes Financiare raporton se gjatë periudhës janar-qershor 2021, dëmet e paguara bruto nga sigurimi motorik kapën vlerën 2 miliardë lekë, afërisht 20 milionë dollarë, duke pësuar një rritje me rreth 51.13% krahasuar me të njëjtën periudhë të një viti më parë.

Ndërkaq, Primet e sigurimit të detyrueshëm motorik, gjatë periudhës janar-qershor 2021 arritën rreth 5 miliardë lekë, ose 11.57% më shumë se në periudhën janar-qershor 2020.

Produkti MTPL e brendshme, termi për kontratat e sigurimit të mjeteve, në periudhën janar-qershor, pati një rritje prej 10.41% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 12.07% krahasuar me periudhën janar-qershor 2020.

Produkti Karton Jeshil në periudhën janar-qershor pati një rritje prej 12.08% të vëllimit të primeve të shkruara bruto. Kjo u shoqërua nga një rritje e numrit të kontratave prej 16.02% krahasuar me periudhën janar-qershor 2020.

Produkti Sigurim Kufitar, në periudhën janar-qershor, pati një rritje 79.88% të vëllimit të primeve të shkruara bruto krahasuar me periudhën janar-qershor 2020. Edhe numri i kontratave u rrit me 90.69%.

Gjatë periudhës janar-qershor 2021, dëmet e paguara bruto në tregun e sigurimeve, arritën në rreth 3,742 milionë lekë, ose 8.3% më pak se në periudhën janar-qershor 2020, ndikuar kryesisht nga pagesa e konsiderueshme e dëmeve të tërmeteve përgjatë vitit 2020.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.