Aksidentet rrugore, AMF krijon aplikacion – Mundësi për përllogaritjen automatikisht e dëmit, mjafton të futen të dhënat
Çdo qytetar do të mund të përllogarisë vetë vlerën e dëmeve në rast se përfshihet në një aksident automobilistik. Autoriteti i Mbikëqyrjes Financiar ka zhvilluar në faqen e saj zyrtare aplikacionin e llogaritësit të dëmeve ndaj personit, në rastet e aksidenteve nga mjetet motorike në sektorin e transportit. Aplikacioni bazohet në metodologjinë e re të llogaritjes së dëmshpërblimit që mbulohet nga kontrata e sigurimit të detyrueshëm në sektorin e transportit”, i cili hyri në fuqi më 1 korrik 2021.
Ky aplikacion u vjen në ndihmë palëve përfituese, si edhe vetë profesionistëve apo ekspertëve të fushës në vlerësimin e dëmit dhe trajtimin e kërkesave për dëmshpërblim. Përllogaritësi bazohet në disa supozime, vlerat e përllogaritura janë orientuese dhe synojnë të informojnë përdoruesit mbi masën e dëmshpërblimit.
Aplikacioni është ndërtuar për përllogaritjen e vlerës së dëmshpërblimit në rastet e dëmit ndaj personit me pasojë paaftësinë e përhershme për punë ose me pasojë vdekjen, shpjegon Autoriteti i Mbikëqyrjes Financiare.
Risitë që sjell aplikacioni janë:
- Përllogaritja automatike e vlerës së dëmit;
- Transparencë mbi vlerën e dëmit pasuror dhe dëmit jopasuror. Pasqyrimi i vlerës për çdo figurë dëmi;
- Mundësi përdorimi të aplikacionit nga ana e të dëmtuarve, si edhe profesionistëve/ekspertëve të fushës së sigurimeve, mbi bazën e disa supozimeve.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.