Aksidentet, zgjidhje me mirëkuptim mes shoferëve – Nëse dëmi është më i vogël se 30,000 lekë, drejtuesit do plotësojnë vetë formularin

Drejtuesit e mjeteve do kenë mundësinë të zgjidhin në mënyrë miqësore dhe me mirëkuptim rastet e dëmtimeve më të vogla se 30 mijë lekë, pa iu drejtuar organeve të rendit për të përcaktuar fajtorin. Autoriteti i Mbikqyrjes Financiare ka hedhur për konsultim public formularin e njohur si “Raporti Evropian i Aksidenteve” i cili do të plotësohet nga drejtuesit e përfshirë në aksidente nëse ata gjejnë gjuhën e përbashkët.

Bazuar në Ligjin nr. 32/2021 “Për sigurimin e detyrueshëm në sektorin e transportit”, drejtuesit e mjeteve të përfshirë në aksident rrugor për dëmet ndaj pronës me vlerë deri në 30.000 lekë, nëse bien dakord, duhet të plotësojnë, të nënshkruajnë dhe të shkëmbejnë “Raportin Evropian të Aksidenteve”. Nëse nuk bien dakord, duhet të marrin procesverbalin e konstatimit të shkeljes nga Policia Rrugore.

Formulari përmban disa kuti të cilat shpjegojnë rrethanat e ndodhjes së aksidentit, si, nëse mjeti ishte në lëvizje, i parkuar, ndërronte korsi, godiste mjetin tjetër, apo lëvizte në mënyrë të gabuar.

Raporti, i nënshkruar nga të dy drejtuesit e mjeteve, nënkupton që ngjarja ka ndodhur sipas rrethanave, modaliteteve dhe pasojave të pasqyruara në formular. “Raporti Evropian i Aksidenteve” i bashkëlidhet kërkesës për dëmshpërblim, e cila trajtohet nga shoqëria e sigurimit. Për dëmet me vlerë mbi 30.000 lekë, drejtuesit e mjeteve duhet patjetër të marrin procesverbalin e konstatimit të shkeljes nga Policia Rrugore.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.