Aksion për lyerjen e stolave – 2 mijë stola të rinj do t’i shtohen Tiranës
Afro 2 mijë stola të rinj dhe 1480 kosha janë parashikuar të shtohen në të gjithë kryeqytetin, gjatë këtij viti nga Drejtoria e Përgjithshme Nr.1 e Punëtorëve të Qytetit. Së fundmi, ky institucion ka ndërmarrë një tjetër nismë, këtë herë për lyerjen e stolave në lulishtet e kryeqytetit.
Aksioni u fokusua në lulishten pranë stadiumit ‘Selman Stermasi’, si një nga më të frekuentuarat në kryeqytet, ku administrata e DPN1 u angazhua për lyerjen e të gjithë stolave. Kësaj nisme iu bashkuan edhe fëmijët e punonjësve të administratës së DPN1.
Pavarësisht kujdesit të punonjësve, herë pas here ka raste të dëmtimit të stolave nga qytetarë të papërgjegjshëm, edhe pse kjo dukuri është më e shpeshtë në zonat larg qendrës. Gjatë gjithë kohës, DPN1 është në gatishmëri për të zëvendësuar stolat e dëmtuar apo instaluar stola të rinj, ku sipas statistikave të nxjerra nga Drejtoria e Gjelbërimit më 2016-ën janë vendosur 249 stola dhe 551 kosha.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.