Aksioni i pastrimit shtrihet edhe në Kosovë – Haradinaj dhe Klosi inaugurojnë nismën

Kryeministri i Kosovës, Ramush Haradinaj dhe Ministri i Turizmit dhe Mjedisit Blendi Klosi hapën zyrtarisht aksionin “Të pastrojmë Kosovën”  në lagjen “Kalabria” që njihet si një nga zonat më të mëdha të ndotura në Prishtinë.

“Falënderoj të gjithë që jeni këtu e sidomos fëmijët, rininë e të gjithë edhe institucionet e vendit tonë, qeverinë, ambasadorët, FSK, KFOR-in dhe ministrin nga Shqipëria Klosin, dhe të gjithë që sot jeni këtu për ta pastruar Kosovën. Në ditën botërore për të pastruar, për një botë të pastër edhe ne e fillojmë aksionin me pastru Kosovën pa dallim as gjini, gjuhë, feje, etnie ose profesioni pra të gjithë sot jemi së bashku me e pastru vendin tonë”, u shpreh Haradinaj.

I shoqëruar nga të rinjtë vullnetarë nga Tirana e Durrësi ministri Klosi garantoi mbështetjen për aksione të përbashkëta në të dyja anët e bjeshkëve me qëllim një mjedis të pastër dhe zhvillimin e turizmit.

“Ne jemi për të mbështetur lëvizjen vullnetare të të rinjve, lëvizjen vullnetare të shoqërisë civile e cila edhe sot po dëshmon se në të gjithë botën edhe në Shqipëri edhe në Kosovë, që janë për mjedisin janë për pastërtinë, janë për një mjedis të pastër por në radhë të parë që ne të kemi një jetë të qëndrueshme. Përpjekjet që do të ndërmarrim sot është fillimi i një fushate që ne duam ta ndërmarrim gjatë gjithë vitit të ardhshëm për të pasur në të dyja anët e bjeshkëve një ambient të pastër, një zonë turistike të qëndrueshme, e në radhë të pare të kemi mirëqenie për qytetarët,” tha Klosi.

Më herë ministri i Turizmit dhe Mjedisit Blendi Klosi zhvilloi një takim me homologun e tij Matoshi. Gjatë këtij takimi u theksua rëndësia e mbështetjes së lëvizjes vullnetare dhe gjithëpërfshirjes së qytetarëve në pastrimin e mjedisit në Shqipëri dhe në Kosovë. Palët garantuan se mjedisi tashmë është prioritet i politikave të të dyja qeverive.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.