Aksioni në rrugët e kryeqytetit – Policia arreston 6 shtetas për drejtim mjeti në gjendje të dehur dhe pezullon 27 patenta
Gjashtë drejtues mjetesh janë arrestuar në flagrancë për drejtim mjeti në gjendje të dehur nga kontrollet e Policisë Rrugore. Kjo e fundit vijon aksionin në kuadër të Planit Operacional ‘Tispol Korrik 2018’, me objekt kryesor testimin e drejtuesve të mjeteve për nivelin e alkoolit.
Arrestimi i shtetasve është bërë pas përfundimit të koncertit që zhvillohej në Sheshin ‘Skënderbej’, të cilët rezultuan në gjendje të dehur në nivele që varionin nga 0.53 mg/l deri ne 1.07 mg/l.
Ndërkohë, po ashtu Policia Rrugore ka pezulluar 27 leje drejtimi, nga të cilat 15 për shpejtësi mbi normat e lejuara, që varionte deri në 167 km/h si dhe 12 për drejtim mjeti nën ndikimin e alkoolit.
Gjatë kontrollit në rrugët e kryeqyteti janë ndaluar edhe 16 mjete për detyrime administrative të pashlyera, janë ndëshkuar 5 automjete për mosrregullim shpejtësie, kryesisht pranë qendrave të banuara si dhe janë vendosur një numër i konsiderueshëm masash administrative për kundravajtje të ndryshme.
Ndërsa, Policia Rrugore vijon kontrollet me qëllim rritjen e sigurisë rrugore për të gjithë përdoruesit e rrugës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.