Aksioni për ujin – 100 inspektime në ditë, Mazniku: Ndëshkime sipas ligjit
Çdo ditë grupet Task-Forcë të Ujësjellës-Kanalizimeve të Tiranës, Policisë Bashkiake dhe së Policisë së Shtetit verifikojnë mbi 100 biznese të ndryshme, me synimin për të ndërprerë çdo lidhje të paligjshme të ujit të pijshëm. Nënkryetari i Bashkisë së Tiranës, Arbjan Mazniku, dhe Drejtori i Përgjithshëm i UKT-së, Redi Molla, ishin në zonën e Dajtit, për të ndjekur në terren aksionin për disiplinimin e shfrytëzimit të ujit të pijshëm nga lokalet dhe kompanitë që merren me përpunimin dhe tregtimin e ujit në qytet.
“Nga data 1 Shkurt ka filluar aksioni sistematik i UKT-së për inspektimin e detajuar të të gjithë bizneseve, të cilat marrin shërbim nga Ujësjellë Kanalizimet Tiranë, në drejtim të lidhjeve të paligjshme apo mënyrën se si konsumohet uji kryesisht nga bizneset. Kemi në terren 9 grupe pune, të cilat shkojnë nëpër biznese në mënyrë rastësore duke plotësuar dhe formularët e deklarimeve. Bëjnë rreth 100 inspektimi në secilën prej ditëve. Siç dhe ju e keni ndjekur, dje dhe pardje ka pasur edhe inspektime biznesesh, të cilat kanë pasur lidhje të paligjshme. Për ta janë marrë masat respektive, duke përfshirë edhe shoqërimin në komisariatet respektive dhe eventualisht do të bëhen edhe ndjekjet ligjore”, tha Mazniku.
Për t’u ardhur në ndihmë atyre qytetarëve të cilët dëshirojnë të aplikojnë për kontratë të re, apo të përfitojnë nga skema lehtësuese e shlyerjes së debisë. UKT ofron orare të zgjatura shërbimi në të gjitha pikat e saj.
L.R/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.