AKU bllokon 33 ton produkte të skaduara, gati për t’u shpërndarë në treg

Autoriteti Kombëtar i Ushqimit ka bllokuar një subjekt i cili do të shpërndante në treg 33 ton produkte të skaduara. Trupa inspektuese e AKU-së gjatë kontrollit të ushtuar konstatoi se subjekti kishte dy magazina në Shkozë dhe Rinas, ku ruante produktet me qëllim shpërndarjen në treg.

Sipas AKU-së, produktet në magazinën e Shkozës ruheshin në të njëjtin ambient me produktet e rregullta në kushte higjieno-sanitare të papërshtatshme.

Për më tepër në produktet (makarona) të cilat ishin brenda afatit të përdorimit u gjendën prani të insekteve gjë që sjell rrezikshmëri të sigurisë ushqimore

1. çokokrem 400 gr X 11313 copë/ sasi 4525 kg
2. cokokrem 800 gr X 9839 copë/sasi 7871 kg
3. makarona 500 gr X 10203 copë/sasi 5101 kg
4. lëng frutash 0.2 l X 25289 copë/sasi 5077 kg
5. konfleks 250 gr X 5700 copë/sasi 1435 kg

Ndërsa, sipas AKU-së në magazinën tjetër në Rinas, u konstatuan 8.8 ton produkte të skaduara, konkretisht:

1. Peshk Ton 1200gr x6858 copë/sasi 8,229 kg
2. Biskota të ëmbla 1200gr x298copë/sasi 357 kg
3. Biskota të kripura 1200gr x213 copë/sasi 255kg

Autoriteti njofton gjithashtu se subjekti nuk ka përmbushur detyrimin ligjor sipas nenit 24/1 të ligjit të ushqimit, ku duhej të njoftonte menjëherë AKU-në që këto produkte kishin kaluar afatin e përdorimit.

Si rrjedhojë, subjekti është gjobitur me 1 milionë lekë gjobë, bllokim të produkteve me deri në asgjësim si dhe mbyllje të menjëhershme të aktivitetit.

AKU apelon të gjithë qytetarët që të denoncojnë çdo rast abuziv me qëllim garantimin e sigurisë ushqimore dhe i këshillon të tregojnë kujdes  në blerjen e artikujve ushqimorë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.