Alarm i rremë për kursin? Eksportet u rritën me 24% për muajin Maj
Në muajt e fundit, kemi dëgjuar shpesh ankesa alarmuese nga përfaqësues të sipërmarrësve, që pretendojnë se zhvlerësimi i euros në kursin e këmbimit po rrezikon bizneset eksportuese. Por, statistikat tregojnë se eksportet shqiptare nuk janë aspak për të qarë hallin.
Sipas INSTAT, për muajin maj eksportet u rritën me 24% krahasuar me të njëjtën periudhë të një viti më parë dhe me afro 13% krahasuar me prillin. Të dhënat e eksporteve raportohen në lekë dhe përfshijnë edhe efektin e kursit të këmbimit, efekt që duket qartë se nuk qenë dramatik. Me një euro më të fortë rritja do të kishte qenë më e lartë, megjithatë edhe në këtë nivele ecuria e eksporteve është mjaft e mirë. Në pesëmujorin e parë të vitit, eksportet shqiptare arritën vlerën e 131 miliardë lekëve, në rritje vjetore me 18.4%.
Rritja më e lartë krahasuar me vitin e kaluar është regjistruar në grupin “Minerale, lëndë djegëse, energji”, me afro 30%. Rritja ka ardhur sidomos nga eksportet e larta të energjisë elektrike, por edhe nga një përmirësim në eksportet e lëndëve të para.
Rritje të lartë për pesëmujorin po regjistron edhe grupi “Materiale ndërtimi dhe metale”, me një rritje prej afro 29%. Eksportet e këtij grupi konsistojnë kryesisht në çimento dhe në çelik.
Grupi “Tekstile dhe këpucë” vazhdon të mbajë peshën kryesore në eksporte dhe për pesëmujorin e këtij viti u rrit me 10.5%. Rritja e lartë e eksporteve e ka përmirësuar bilancin tregtar të vendit.
Deficiti për pesëmujorin zbriti në 124 miliardë lekë, nga 128 miliardë lekë që ishte në të njëjtën periudhë të vitit të kaluar. Një ndikim të konsiderueshëm në uljen e deficitit ka dhënë edhe rritja shumë e kufizuar e importeve.
Për majin, importet u rritën me më pak se 2% ndaj të njëjtës periudhë periudhë të një viti më parë. Për të gjithë pesëmujorin, rritja e importeve është më pak se 7%. Mbiçmimi lekut në kursin e këmbimit besohet të ketë pasur një ndikim të konsiderueshëm në frenimin e rritjes së importeve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.