Alimadhi, një hap larg përzgjedhjes për garën në Parma

Me 5 mars në Parma do të zhvillohen votimet për përzgjedhjen e kandidaturës që qendrës së majtë për zgjedhjet nga të cilat do të dalë kreu i ri i bashkisë. Në garë për kandidim janë tre persona, mes të cilëve edhe një shqiptar, Gentian Alimadhi. Veç Alimadhit, në këtë përballje të parë janë edhe  Dario Costi e Paolo Scarpa.

44 vjeçari nga Fieri Gentian Alimadhi, me profesion avokat, ka shpallur ambicien që të jetë i pari kryebashkiak i Italisë, “i emigruar nga Shqipëria”. Media italiane i ka kushtuar disa herë artikuj kandidatit potencial, duke evidentuar faktin se në Parma komuniteti i shqiptarëve mund të jetë përcaktues në përzgjedhjen e kandidaturës zyrtare. Nëse Alimadhi do të zgjidhej, atëhere, sipas medias italiane, Italia do të kishte kryebashkiakun e parë emigrant.

Po kush është Gentian Alimadhi?

Ai ka lindur në vitin 1973 në Fier ndërsa ka emigruar në Itali në vitin 1993. Në 1996 është regjistruar në Fakultetin e Jurisprudencës në Universitetin e Parmës. Është diplomuar në vitin 2003 me tezën kërkimore për historinë e traktateve dhe politikës ndërkombëtare, me kërkimin mbi raportet diplomatike mes Shqipërisë dhe Italisë në periudhën 1924-1927. Nga viti 2005 drejton studion e tij ligjore dhe është një ndër avokatët më të suksesshëm në vendin ku banon. Gjithashtu, ai është themelues i shoqatës shqiptare “Scanderbeg” që përfaqëson komunitetin shqiptar në Parma.

Mediat lokale i kanë kushtuar rëndësi avokatit shqiptar në artikujt e tyre duke e cilësuar si favorit për votimet e pas pak ditëve.

“Gentian Alimadhi, 43 vjeçar, avokat. Të gjithë e njohin si emigranti që gjeti fatin në Parma. I mbërritur mbi një anije nga Shqipëria, gjeti një pune, studioi, krijoi familje e bëri karrierë.  Një histori që duket se i përket disa kohëve të tjera. Gentiani ka gjetur “Amerikën” në Parma, po tani?  Tani është i pamjaftuar e tenton një hap tjetër të madh: garën për poltronën e kryebashkiakut” shkruan “ParmaPress”. Por më përpara, kandidati me origjinë nga Shqipëria i duhet të garojë përballë inxhinierit Paolo Scarpa dhe arkitektit Dario Costi për të qenë fytyra e PD-së, edhe pse nuk ka teserën e partisë.

“Historia ime personale. Është në fakt edhe vizioni im për qytetin. Ndjeshmëria ime është ndryshe për tema si emigracioni, integrimi, solidariteti. E jetojmë emigracionin si një emergjencë por ai duhet të konsiderohet si një normalitet. Duhet të qeverisim këtë fenomen. Do të doja të administroja një qytet trashmë multientik.

Beteja ime do të jetë të kemi një edukim të vërtetë qytetar sepse të gjithë duhet të respektojnë rregullat nëse duan të jetojnë këtu. Besoj se jam i vetmi që e kam nisur vërtetë me shtytje nga poshtë. Si të them? Kam hyrë nga dritarja e politikës, jam një personazh i ri. Zbritja ime në fushë reflekton plotësisht nenin 3 të Kushtetutës” shprehet Alimadhi në intervistën dhënë medias lokale.

Gjatë këtyre ditëve, janë zhvilluar disa përballje, ku tre kandidatët kanë shpalosur vizionin e tyre për qytetin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.