Alitalia në prag falimenti – Në Mars mbetet pa para’, vetëm dy opsione në tavolinë

Alitalia është në krizë të thellë likuiditeti dhe kjo nuk është një risi. Por kompanisë ajrore italiane po i skadojnë ditët më shpejt seç pritej. Në fund të Marsit, projektohet që kompania të mbetet pa para`.

Në pamundësi të paguajë 12 mijë punonjësit apo karburantit për avionët, Alitalia do të gjendet përballë falimentit të padiskutueshëm, në rast se nuk do të gjejë një zgjidhje brenda marsit. 40% të aksioneve të kompanisë i zotëron Etihad Airways e Emirateve të Bashkuara arabe.

Aliatalias së dikurshme tashmë i ka mbetur vetëm emri. Prej kohësh, Ryanair i ka zënë vendin si kompania ajrore numër edhe në Itali, 30 milionë pasagjerë kundrejt 22 milionë të Alitalias në vit.

Me këto ritme, edhe Easyjet do ti zërë shumë shpejt vendin e dytë. Alitalia projekton rreth 600 milionë euro humbje operative gjatë këtij viti, çka përkthehet në rreth 2 milionë euro në ditë. Kompanitë low-cost janë shkaktarët kryesorë të këtij kolapsi të kompanisë emblemë italiane.

Çmimet e ulta të biletave që ofrojnë këto kompani kanë tkurrur ndjeshëm të ardhurat e kompanive tradicionale. Në fillim të Janarit, Presidenti i kompanisë, Luca Cordero di Montezemelo premtonte se në harkun e një muaji kompania do të prezantonte planin ambicioz.

Pavarësisht se kanë kaluar më shumë se 6 javë që nga ai premtim, asgjë nuk dihet më shumë rreth planit që mbetet më shumë misterioz sesa ambicioz.

Gjthsiesi, mënyra më e mirë që Alitalia të shpëtojë është kthimi në një kompani të mirëfilltë low-cost, gjë e cila është artikuluar edhe nga vetë drejtues të Alitalias. Plani B është një marrëveshje me Lufthansën.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.