ALSE hedh një hap të ri – Tregtimi i parë nga një shoqëri komisionere
Ditën e enjte u krye transaksioni i parë nga një shoqëri komisionere në Bursën Shqiptare të Titujve, ALSE. Triumf Grup tregtoi 30 njësi Bono Thesari me afat maturimi 6 muaj. Tregtimi u krye gjatë orarit zyrtar të bursës dhe nuk paraqiti asnjë problem edhe në procesin e pas-tregtimit.
Sipas ALSE, ky transaksion shënon një gur të rëndësishëm themeli në procesin e zhvillimit të tregut të titujve në Shqipëri. Ai tregon rritjen e interesit të institucioneve të tjera financiare për të qenë aktivë në ndërmjetësim, për llogari të qytetarëve dhe subjekteve që kanë pozicione në letra me vlerë.
Tashmë subjektet e interesuara për të tregtuar titujt e borxhit që kanë në portofolet e tyre para afatit të maturimit në Shqipëri, mund t’u drejtohen jo vetëm bankave, por edhe shoqërive komisionere të licencuara nga Autoriteti i Mbikëqyrjes Financiare dhe të pranuara si anëtarë nga Bursa ALSE.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.