AMA u tërheq vërejtje OSHMA-ve: Nuk duhet të transmetoni reklama të fshehta!
OSHMA-të nuk duhet të transmetojnë reklama të fshehta dhe komunikime tregtare. Paralajmërimi ka ardhur nga Autoriteti i Mediave Audiovizive në mbledhjen e fundit, ku u diskutua gjerësisht programacioni i transmetuar nga OSHMA-të.
Krahas reklamave të fshehta, po ashtu mbrojtja e fëmijëve në transmetimet audiovizive , përmbajtjet mbi kujdesin shëndetësor dhe medikamentet, evitimi i gjuhës së urrejtjes dhe diskriminimit në çdo formë, barazia gjinore, respektimi i standardit të shkruar dhe të folur të shqipes etj, kanë qenë aspektet më të ndjeshme, për të cilat Autoriteti ka tërhequr vëmendjen e OSHMA-ve në rastet e mosrespektimit të kërkesave ligjore.
Sa i takon reklamave dhe komunikimeve tregtare, sipas AMA-s me gjithë përmirësimit nga subjektet audiovizive, ka ende raste të promocionit të fshehtë. Theksi u vu kryesisht te kronikat informative, ku sipas AMA-s rezultojnë të jenë reklamë e fshehtë.
Në nenin 3, pika 7, të ligjit 97/2013, i ndryshuar, përcaktohet se komunikim i fshehtë audioviziv me natyrë tregtare është “paraqitja me fjalë ose figurë e mallrave, shërbimeve, emërtimit, markës së prodhimit ose i veprimtarive të një prodhuesi mallrash ose ofruesi shërbimesh, në programe, kur një paraqitje e tillë, nga ofruesi i shërbimit të mediave, ka për qëllim të shërbejë si reklamë dhe mund të mashtrojë publikun mbi natyrën e tij.”
Përmbajtjet audiovizive me informacione dhe diskutime mbi kujdesin shëndetësor dhe prezantimin e produkteve farmaceutike, ishin një tjetër aspekt për të cilin bordi kërkoi vëmendje edhe më të madhe për të shmangur abuzimet nga operatorët.
Sipas AMA-s ndalohet qëndrimi i disa mjekëve në programet audiovizive , pasi bien në kundërshtim “Kodin e etikës dhe deontologjisë mjekësore”. Ndërkohë, nuk i lejohet gjithashtu të bëjë asnjë reklamë në favor të aktivitetit të tij personal apo një institucioni të caktuar.
Më tej, në mbledhje u theksua se mbrojtja e fëmijëve gjatë transmetimeve audiovizive vijon të mbetet një prioritet për monitorimet dhe vlerësimet e AMA-s, ku sipas kësaj të fundit janë evidentuar sërish shkelje.
“Mbrojtja e fëmijëve, reklamat dhe komunikimet tregtare si dhe përmbajtjet e transmetuara mbi kujdesin shëndetësor dhe përdorimin e medikamenteve janë cilësuar nga bordi si aspekte me prioritet për vitin 2019 e në vijim, ndaj dhe do të monitorohen dhe vlerësohen intensivisht”, deklaroi AMA.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.