Amazon forcon prezencën në Francë – Do shtojë 1,800 vende pune, ndërkohë që shitësit e tjerë largohen
Gjiganti i tregtisë në rrjet, Amazon, deklaroi këtë javë se do të krijojë 1,800 vende pune në Francë këtë vit, që është edhe tregu më i madh europian pas Britanisë dhe Gjermanisë. Kjo lëvizje do të çojë numrin e stafit të përhershëm në 9,300 deri në fund të 2019-ës dhe reflekton angazhimin e kompanisë në tregun francez, ku ka investuar më shumë se 2 miliardë euro që prej 2010-ës. Plani i Amazon vjen pasi Conforama, njësia franceze e shitësit me pakicë Steinhoff, planifikon të shkurtojë 1,900 vende pune në Francë.
Sipas zyrtarëve në Francë, shitjet me pakicë tradicionale po përballen me një transformim dhe koincidenca e shifrave e reflekton këtë. Qeveria franceze ka bërë të ditur se do të jetë vigjilente në lidhje me shkurtimin e vendeve të punës nga Conforama dhe do të limitojë ndikimin. Amazon është zgjeruar në mënyrë të qëndrueshme në Francë, ku ka 20 pika, përfshirë 6 qendra të logjistikës. Amazon është lideri i tregtisë në rrjet në Francë, me një pjesë tregu prej 17.3%,. Megjithatë, pjesa në treg e produkteve ushqimore të kompanisë zë vetëm 2%.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.