“Amazon” lehtëson blerjet duke hequr domosdoshmërinë e një karte krediti
Amazon është në bisedime të hershme me institucionet financiare duke përfshire “J.P. Morgan Chase”, për të ndihmuar në blerjen e produkteve nga klientë që nuk kanë llogari bankare.
Kjo është lëvizja më e fundit e gjigantit të tregtisë elektronike për të zgjidhur një nga barrierat më të mëdha të blerjeve në faqen e saj të internetit: mungesa e një karte krediti.
Për Amazon, grupi i blerësve që mund të paguajnë vetëm me kartëmonedha, po bëhet gjithnjë e më i rëndësishëm.
Të rinjtë po i shmangin gjithnjë e më shumë kartat e kreditit, pasi priren të jenë më të pakënaqur ndaj institucioneve bankare se paraardhësit e tyre. Sipas një raporti të vitit 2015 të “Goldman Sachs”, tridhjetë e tre për qind e të rinjve u shprehën se nuk parashikojnë të kenë nevojë të kenë një llogari bankare në pesë vitet e ardhshme.
Në nëntor, Amazon njoftoi se blerësit në dyqanet “7-Eleven” mund të depozitonin nga 15 deri në 500 dollarë në një llogari të Amazon nëpërmjet programit “Amazon Cash”. Blerësit mund t’i përdorin më pas këto të holla për të blerë në Amazon.
“Ne menduam se kishim një mundësi tregu duke përfshirë konsumatorët të cilët nuk janë në gjendje të marrin pjesë në ekonominë digjitale. “Amazon Cash” është pjesë e asaj strategjie të përgjithshme”, tha Gurmeet Singh, zyrtari kryesor digjital dhe shefi i informimit në “7–Eleven”.
Programe të ngjashme janë nisur edhe me “CVS”, “Speedway”, “Sheetz” dhe dyqane të tjera.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.