Amazon, shënjestra e radhës e BE – Rregullatorët nisin hetimin për palët e treta që shesin nëpërmjet firmës
Rregullatorët e Bashkimit Europian, që vendosën gjobë prej 5 miliardë dollarë ndaj Google, i janë kthyer Amazon. Komisionerja e Konkurrencës, Margrethe Vestager, ka nisur të pyes tregtarët për përdorimin e të dhënave të tyre nga Amazon. Sipas saj, dyshohet se Amazon po përdor të dhëna nga tregtarët që shesin mallra nëpërmjet kompanisë, për të fituar avantazh ndaj tyre. “Jemi ende në fazën fillestare dhe nuk kemi hapur një rast hetimi në mënyrë formale.
Ne po përpiqemi të kuptojmë të gjithë skemën”, tha Vestager. Hetimi vjen ndërkohë që shitësi online më i madh në botë përballet me thirrje të vazhdueshme nga rregullatorët. Investitorët kanë përmendur prej kohësh përmasën e Amazon si një arsye për ta shpërbërë kompaninë. Presidenti Donald Trump ka thënë se aksionet kundër Amazon përbëjnë sulme ndaj kreut ekzekutiv Jeff Bezos, që zotëron gjithashtu Washington Post. Vestager ka fuqinë për ta gjobitur kompaninë me 10% të xhiros globale për thyerjen e rregullave të konkurrencës në BE. Më herët gjatë vitit, ajo vendosi një gjobë rekord prej 5 miliardë dollarë kundër Google, për biznesin e Android.
Ajo ka nisur gjithashtu një hetim ndaj Apple dhe blerjen e aplikacionit Shazam. Amazon lejon palët e treta që të shesin mallra në Amazon nëpërmjet programit të shitësve. Vestager po përpiqet të zbulojë nëse Amazon i vendos këto shitës në disavantazh, duke përdorur të dhënat e tyre të shitjeve për të nxitur shitjet e vetë kompanisë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.