Ambasadori japonez në Kamëz: Vitin tjetër do të sjellim disa kompani japoneze në Shqipëri
Ambasadori japonez në Shqipëri Makoto Ito gjatë një vizite në Kamëz deklaroi se disa kompani japoneze kanë treguar interes për të investuar në Shqipëri, ku përfituese do të jetë edhe bashkia e Kamzës.
“Ne nuk kemi investime direkte të Japonisë në Shqipëri, për shkak të taksave. Ka pasur vetëm një kompani, por edhe ajo ka ikur. Po mundohem të ftoj disa biznese japoneze. Vendndodhja juaj është mjaft e favorshme, si dhe ka forcë pune. Në qoftë se kompanitë japoneze do të vijnë në Shqipëri, edhe Kamza do të jetë pjesë e shtrirjes së aktivitetit të tyre. Paraprakisht jam duke ftuar disa kompani japoneze, të cilat janë të interesuara”, – tha ambasadori japonez.
Ndërsa nga ana tjetër kryebashkiaku i Kamzës Xhelal Mziu i kërkoi ambasadorit japonez që të ushtronte ndikimin e tij që Kamza të jetë përfituese e financimeve dhe projekteve të qeverisë, pasi për pesë vite me radhë nuk ka pasur asnjë financim projektesh nga ana e qeverisë.
“Do të doja të ushtronit ndikimin tuaj te qeveria japoneze për të bërë që Kamza të jetë përfituese e projekteve të saj. Gjithashtu do të kërkoja bashkëpunimin për të pasur biznese japoneze në Kamëz, pasi kemi një klimë të favorshme fiskale, si dhe një krah pune të një popullsie me mesatare 4 vjet më të re se e gjithë Shqipëria”, – u shpreh kryebashkiaku Mziu.
Ambasadori japonez shpreh se vitin tjetër do të sjellë disa kompani japoneze në Shqipëri, gjithashtu edhe Kamëz, të cilët janë të interesuar për të zhvilluar biznesin e tyre këtu dhe për të punësuar qytetarë të Kamzës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.