Ambasadori Soreca për reformën në drejtësi: “Angazhimi më i madh politik e financiar, pasaportë drejt BE-së”
“Ka qenë angazhimi ynë më i madh politik dhe financiar”, shprehet z.Soreca për reformën në drejtësi në fjalën që ka mbajtur në eventin e organizuar nga Ministria e Drejtësisë.
Ambasadori i BE-së në Shqipëri më tej tha se kjo reformë është pasaporta dhe motori që do të shtyjë Shqipërinë drejt BE-së, duke shpresuar se institucionet e reja do të sjellin përgjegjësi dhe pavarësi, në sytë e qytetarëve.
Soreca shtoi se nevojitet një zgjidhje e qëndrueshme për vakancat e krijuara nga procesi i rivlerësimit dhe shkolla e Magjistraturës duhet të jetë pjesa qëndrore e kësaj zgjidhje sipas tij.
Në aspektin afatgjatë, vijoi Soreca, duhet të bëjmë të pamundurën që trupat e reja të gjyqësorit, Këshillat, Inspektori i Lartë i Drejtësisë dhe KED të funksionojnë në më të mirën e tyre dhe të ruajnë parimet e përgjegjshmërisë dhe pavarësisë.
Më tej z.Soreca është shprehur se mbështetja e BE-së dhe Amerikës do të jenë thelbësore për këtë reformë duke i qëndruar shteti shqiptar në krah:
“Bashkëpunimi i të gjithë aktorëve do të jetë çelësi për suksesin që do të arrihet. BE dhe miqtë tanë amerikanë do të vazhdojnë të qëndrojnë krah jush për të vazhduar këtë ritëm reformash. Reforma në drejtësi në Shqipëri na ka mësuar se me kurajë, me shumë punë dhe dëshirën për një të ardhme më të mirë gjithçka mund të arrihet. Gjatë këtij viti vendimtar, 2020, do të arrijmë edhe më shumë. Reforma në drejtësi është pasaporta, motori që e shtyn Shqipërinë drejt anëtarësimit në BE.” – u shpreh ai.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.