“Amerikanët e vaksinuar, të vendosin maska” – CDC ndryshon rekomandimin për ambientet e brendshme prej variantit Delta

Amerikanët e vaksinuar plotësisht kundër Covid-19 duhet të vendosin maska në ambiente publike të brendshme, në rajone ku koronavirusi po përhapet shpejtë, sipas autoriteteve amerikane të shëndetësisë.   Në një udhëzim të ashpërsuar të publikuar më herët gjatë muajit, Qendra për Kontrollin dhe Parandalimin e Sëmundjeve, rekomandoi gjithashtu se të gjithë studentët, mësuesit dhe stafi i shkollave, duhet të veshin maska pavarësisht vaksinimit.  Zyrtari më i lartë i sëmundjeve infektive në vend, Anthony Fauci, tha se po përballen me një tip shmangës të virusit.

“Virusi ka ndryshuar. Rekomandimet dhe diskutimet që po bënim disa muaj më parë, ku bazohej edhe Qendra për Kontrollin e Sëmundjeve,  kishin të bënin me variantin Alpha, që është shumë ndryshe nga ai Delta. Varianti Delta ka një aftësi të pazakontë të përhapjes shumë shumë më shpejtë se Alpha”, u shpreh Anthony Fauci, Zyrtari i lartë i sëmundjeve infektive në SHBA

Rastet me Covid në Shtetet e Bashkuara janë rritur për shkak të variantit më ngjitës delta që u identifikua në Indi, që zë tashmë 80% të rasteve të reja.  Presidenti i SHBA Joe Biden, tha se rritja e vaksinimit dhe veshja e maskave duhet të ndihmojë vendin që të shmangë masat e karantinës si në vitin 2020. Qendra për Kontrollin dhe Parandalimin e Sëmundjeve tha se mbi 60% e rretheve kanë norma të transmetimit mjaftueshëm për të garantuar veshjen e maskave.    Shtetet e Bashkuara kryesojnë në botë me numrin mesatar të rasteve ditore, duke zënë 1 në çdo 9 raste të raportuara çdo ditë në botë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.