AMF: Dëmet e paguara në tregun e sigurimeve në trend rritës
Pagesat e dëmeve në tregun e sigurimeve po ndjekin një trend rritës, sipas Autoritetit të Mbikëqyrjes Financiare. Nga të dhënat e AMF, rezulton se për periudhën Janar – Tetor 2017 u rritën me 15.8 për qind, krahasuar me po të njëjtën periudhë të vitit 2016.
Kështu, gjatë këtij dhjetë mujori janë paguar mbi 4 miliardë lekë dëme, ku pjesa më e madhe e tyre sipas AMF-së i përket sigurimit motorik, me një vlerë lekësh prej 2.47 miliardë lekë. Nga kjo shumë, 2 miliardë lekë dëme janë paguar në bazë të kontratave të sigurimit “Përgjegjësi motorike ndaj palëve të treta” për 7 404 dëme të shkaktuara në këtë kategori.
Sa i takon sigurimit të Jo-Jetës, AMF tregon se është shënuar një rritje me rreth 45 për qind, në krahasim me janar-tetor 2016, ku janë paguar 35 804 dëme.
Rritje ka pësuar edhe pagesa e dëmeve për sigurimin e jetës, ku rezultojnë të jenë bërë pagesa për rreth 1 287 kontrata, duke shënuar një rritje me rreth 45 për qind, në krahasim me një vit më parë të njëjtës periudhë.
Ndërkohë, Autoriteti i Mbikëqyrjes Financiare vijon punën për shlyerjen brenda vitit 2018 për të gjitha detyrimeve të prapambetura për periudhën 2002 – 2016, të ardhura nga Fondi i Kompensimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.