AMF dhe Tatimet koordinojnë inspektimet për kompanitë e sigurimeve dhe subjektet e tjera
Autoriteti i Mbikëqyrjes Financiare dhe Drejtoria e Përgjithshme e Tatimeve do të bashkëpunojnë në kryerjen e inspektimeve në shoqëritë e sigurimeve dhe në subjektet e tjera që janë në mbikëqyrjen e AMF-së. Po ashtu, dy institucionet do të bashkëpunojnë edhe në shkëmbimin e informacionit. Marrëveshja e bashkëpunimit u nënshkrua gjatë ditës së sotme mes drejtuesve të institucioneve.
“Nënshkrimi i kësaj marrëveshjeje shërben si bazë bashkëpunimi ndërmjet dy institucioneve, me qëllim kryerjen e inspektimeve të përbashkëta midis Autoritetit të Mbikëqyrjes Financiare dhe Drejtorisë së Përgjithshme të Tatimeve, sipas afateve dhe rregullave proceduriale në fuqi për kontrollin, si dhe shkëmbimin e informacioneve në funksion të këtyre inspektimeve” njofton AMF.
Objekt i inspektimeve të përbashkëta do të jenë zbatimi i dispozitave ligjore e nënligjore në fuqi që rregullojnë veprimtarinë e tregjeve financiare në mbikëqyrje, ligjshmëria e kryerjes së shpenzimeve nga ana e shoqërive të sigurimeve, policat e sigurimit të detyrueshëm në sektorin e transportit, si edhe ligjshmëria e veprimtarisë së subjekteve nën mbikëqyrjen e AMF-së.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.