AMF inspekton platformat online – “Stock International Albania” mbyll zyrat në Tiranë

Bordi i Autoritetit të Mbikëqyrjes Financiare, në mbledhjen e fundit, ka kërkuar materiale shtesë për përfaqësinë e “Lead Capital Markets” në Shqipëri, që mbante emrin “Stock International Albania”.

Kjo shoqëri kishte marrë miratimin nga AMF, për të ushtruar veprimtarinë e agjentit të brokerit të letrave me vlerë, në qershor të vitit 2016.

Por, pas një inspektimi të bërë pranë kësaj shoqërie, rezultoi se, që nga marsi i këtij viti ishte mbyllur zyra dhe ishte larguar stafi, si pasojë e vështirësive financiare.

Gjithashtu, “Stock International Albania” nuk  kishte raportuar mbi pasqyrat financiare të vitit 2016 dhe mbi aktivitetin e kryer për periudhën 1 janar-31 mars 2017.

AMF ka vendosur edhe një gjobë prej 100 mijë lekësh ndaj kësaj shoqërie.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.