Amnistia e kapitalit – Ekspertët: Duhet të japë siguri, varet prej “frikës” nga shteti
Ndërsa kryeministri Rama paralajmëroi një tentativë të re për amnistimin e kapitaleve të padeklaruara, ekspertët shprehen skeptikë për suksesin e një mase të tillë. Eksperti kontabël, Ilir Binaj, thotë se amnistia e parë që u tentua në qeverisjen e Partisë Demokratike dështoi për shkak të frikës së verifikimeve dhe rrezikut të të qenit subjekt i masave ndëshkimore në të ardhmen. Sipas tij, do të jetë e rëndësishme që një amnisti e mundshme të ofrojë qartësi të plotë dhe siguri ndaj përndjekjeve pasi kapitalet të jenë deklaruar.
Sipas tij, i rëndësishëm për suksesin e amnistisë do të jetë edhe perceptimi i taksapaguesve rreth një forcimi të kontrollit shtetëror në të ardhmen. Nëse individët dhe bizneset do të ndjejnë një rrezik në rritje se do t’iu kërkohet të justifikojnë të ardhurat informale, atëherë kjo do t’i shtynte t’i deklaronin dhe t’i amnistonin ato.
Zoti Binaj mendon se klima aktuale politike nuk favorizon suksesin e një amnistie. Mungesa e opozitës në vendimmarrje shkakton pasiguri lidhur me atë që mund të ndodhë pas një ndryshimi eventual të pushtetit.
Amnistia e tentuar nga qeveria Berisha në vitin 2011 nuk dha rezultatet e shpresuara. Ekspertët e shpjeguan këtë kryesisht me dështimin për të siguruar votat që do të duheshin për të ndryshuar Kodin Penal, sipas të cilit evazioni fiskal klasifikohet si vepër penale dhe dënohet deri në tre vjet burg.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.