Analisti i naftës: Rusisë do t’i duhet të zvogëlojë prodhimin e naftës me 20% pas një embargoje të BE-së

Bashkimi Europian po bën përparim drejt një embargoje të naftës ruse, e cila do ta detyronte Moskën të ulë ndjeshëm prodhimin e saj të naftës në të ardhmen e afërt, sipas Matt Smith, analist kryesor i naftës në Kpler.

Nga rreth 10 milionë fuçi në ditë aktualisht, prodhimi i naftës ruse mund të bjerë me 20% “në një vit ose dy” pas heqjes së importeve nga BE, tha ai për Insajderin. Kjo është shumë më e shpejtë se sa ishte parashikuar në një raport të ri nga Rystad Energy, i cili tha se e njëjta rënie do të ndodhë deri në vitin 2030.

“Ndërsa varësia europiane bie, është e vështirë të shihet një skenar ku prodhimi rus nuk bie ndjeshëm,” tha Smith.

Për të qenë të sigurt, Moska tashmë ka eksploruar tregje alternative në Evropë dhe ka eksportuar më shumë naftë në Azi, veçanërisht në Indi. Ka pasur gjithashtu një rritje të ngarkesave që shkojnë në objektet e magazinimit në Afrikën e Jugut, vuri në dukje ai.

Kina shihet gjithashtu si një treg kyç për Rusinë, por rinovimi i bllokimeve të rrepta COVID-19 ka frenuar kërkesën për naftë.

“Kina është shpresa e madhe për Rusinë, por është ende e vështirë të imagjinohet një skenar ku Kina do të thithte të gjithë rënien nga një embargo e BE-së”, shtoi Smith.

Dhe sapo Rusia të shkurtojë prodhimin, ajo mund të ketë pasoja të rëndësishme dhe afatgjata në aftësinë e saj për të prodhuar naftë në të ardhmen. Klimat ekstreme në rajonet e prodhimit të naftës si Siberia mund të dëmtojnë rezervuarët dhe fushat e naftës nëse ato qëndrojnë të fjetura për periudha të gjata.

“Të shkurtosh prodhimin, është me të vërtetë një skenar i rastit më të keq, për shkak të pasigurisë së dëmit të mundshëm që mund të shkaktojë,” tha Smith.

N.Xh / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.