Analiza e financave vendore – Shtimi i kompetencave rrit të ardhurat dhe shpenzimet
Financat vendore janë rritur gjatë këtij fillim viti, ndërkohë që janë shtuar burimet e të ardhurave. Sipas një analize të Ministrisë së Financave, në tremujorin e parë të vitit 2017 evidentohet një përmirësim në financat vendore, ku të ardhurat dhe financimet e përgjithshme janë rritur me 43% në krahasim me tremujorin e pare të vitit 2016.
Burimet kryesore të rritjes janë transfertat ndërqeveritare të kushtëzuara (+358%); transfertat e pakushtëzuara dhe ato specifike për funksionet e reja (+19%); dhe taksat dhe tarifat vendore që administrohen nga vetë bashkitë në autonomi të plotë (+64%).
Në tremujorin e parë të vitit 2017, ndërkohë që të ardhurat nga tarifat e shërbimeve janë rritur me vetëm 15% në krahasim me tremujorin e parë të vitit 2016, të ardhurat nga taksat janë dyfishuar.
Sipas kësaj analize, problemet strukturore të administrimit të taksave dhe tarifave vendore vazhdojnë të mbeten prezente. Kështu taksa mbi pasurinë e paluajtshme, është taksa më e rëndësishme që administrojnë bashkitë.
Peshën më të madhe e zë taksa mbi ndërtesat në zonat urbane. Taksa mbi tokën bujqësore mbetet shumë e ulët (vetëm 18% e totalit) ndërkohë që, në tremujorin e parë të vitit 2017 nuk evidentohet asnjë e ardhur nga taksa për truallin urban.
Administrimi i kësaj të fundit paraqitet shumë i vështirë për mungesën pothuajse totale të regjistrave. Ndërsa shpenzimet e përgjithshme vendore, të financuara me fonde të vetë bashkive dhe transfertave të kushtëzuara nga ministritë apo konkurruese nga Fondi për Zhvillimin e Rajoneve janë rreth 70% më të larta se në tremujorin e parë të vitit 2016.
Sikurse pritej, me transferimin e funksioneve të reja tek bashkitë, evidentohet një rritje të shpenzimeve për personelin prej rreth 850 milion lekë ose 25% krahasuar me të njëjtën periudhë të një viti më parë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.