Analiza përfundimtare e pilulës së Pfizer – Pranë 90% efektshmëri në parandalimin e shtrimit në spital dhe vdekjeve

Pfizer deklaroi se analizat përfundimtare të pilulës së Covid-19 treguan një efektshmëri pranë 90% në parandalimin e shtrimit në spital dhe vdekjeve, në pacientët me rrezik të lartë, dhe të dhënat e fundit në laborator sugjerojnë se ilaçi e ruan efektshmërinë edhe ndaj variantit Omicron.  Prodhuesi amerikan i barnave deklaroi muajin e kaluar se pilula antivirale ishte rreth 89% efektive në parandalimin e shtrimit në spital dhe vdekjeve, kur krahasohej me jnë placebo, bazuar në rezultatet e brendshme prej rreth 1,200 njerëz.

Të dhënat e fundit përfshinë 1,000 njerëz të tjerë. Në reagim ndaj analizës, presidenti Joe Biden deklaroi se qeveria amerikane ka vendosur porosi për mjaftueshëm pilula që të trajtohen 10 milionë amerikanë.  Askush nuk vdiq në provat që morrën trajtimin, krahasuar me 12 vdekje mes pacientëve me placebo. Pilulat e Pfizer merren së bashku me një antiviral më të vjetër, ritonavir, çdo 12 orë për 5 ditë,  me trajtimin që nis menjëherë pas shfaqjes së simptomave. Nëse autorizohet, trajtimi do të shitet me emrin Paxlovid.

Pfizer publikoi gjithashtu të dhëna paraprake nga një provë e dytë klinike që sigjeron se trajtimi redukton shtrimin në spital me rreth 70%, në një provë më të vogël të të rriturve sipas rrezikut, përfshirë njerëzit e vaksinuar me rrezik të lartë. Pavarësisht parëndësisë statistikore, Pfizer tregoi një trend pozitiv tek të dhënat për reduktimin e rrezikut.  Shefi mjekësor i Pfizer, Mikael Dolsten, tha se pret së shpejti autorizimi npër përdorim tek individët me rrezik të lartë nga FDA dhe agjenci të tjera. Pfizer i ka dorëzuar të dhënat muajin e kaluar.  Për momentin, nuk ka ndonjë pilulë antivirale të Covid-19 të autorizuar në SHBA.

Rivali Merck ka kërkuar për autorizim për përdorim emergjent për ilaçin molnupiravir, por ky i fundit redukton shtrimin në spital dhe vdekjet tek pacientët me rrezik të lartë me vetëm 30%, sipas provave klinike. Disa shkencëtarë ngritën gjitahshtu shqetësime mbi defekte të mundshme në lindje nga ilaçi i Merk, si dhe shqetësime të tjera se mund të shkaktojë mutacion të virusit.  Ilaçi i Pfizer funksionon ndryshe, pasi është pjesë e një kategorie të barnave të quajtura ndaluesit e proteazës, që janë përdorur deri më tani për të trajtuar HIV, hepatitin C dhe viruse të tjera.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.