Analizë – Si ka ndryshuar harta e të prekurve me COVID – 19 që nga 9 marsi. Qytetet që kanë “ngrirë”

Që nga data 9 mars, ku u konfirmuan rastet e para me COVID – 19 në Shqipëri (përkatësisht në Tiranë) e deri këtë të martë, shtrirja gjeografike e COVID – 19 është në 17 qytete të Shqipërisë.

Por, ajo që vihet re nga të dhënat e përditësuara e të prekurve që nga 9 marsi e deri në 31 mars është se në këto 22 ditë, ndërsa numri i të prekurve është rritur në disa qytete, si Tirana apo Durrësi, në të tjera, edhe pse rastet e të prekurve mund të jenë shfaqur që në fillim të përhapjes së COVID – 19 në Shqipëri, me kalimin e kohës nuk është shënuar asnjë rast tjetër.

I tillë është rasti i Rrogozhinës, në të cilën rasti i parë me COVID – 19 u shënua me 12 mars, ndërsa me 13 mars u shënua një tjetër rast, e më pas, deri në 31 mars nuk ka pasur as edhe një rast tjetër të prekur, sipas të dhënave zyrtare.

Nga ana tjetër, e njëjta dukuri ka ndodhur edhe me qytetin e Beratit, në të cilin rasti i parë i prekur me COVID – 19 është shënuar me 24 mars, e në këto 7 ditë nuk ka pasur asnjë të prekur tjetër. Po njësoj, me 24 mars janë shënuar edhe 2 rastet e para të të prekurve në Has, i cili gjithashtu ruan një “status  quo ” të të prekurve.

Përsa i përket përhapjes më të madhe, në këto 22 ditë, është ndjerë në Tiranë, në Durrës e në Fier. Ka ende qytete të cilat nuk figurojnë të kenë pasur të prekur, si Peshkopia, Laçi, Pogradeci, Saranda, etj. Ndërkaq, më poshtë lista e rasteve të përditësuara në të gjithë Shqipërinë:

Tiranë 129 raste

Durrës 26

Lushnjë 4

Elbasan 5

Fier 23

Kavajë 4

Rrogozhinë 2

Korçë 15

Vlorë 5

Shkodër 8

Lezhë 5

Berat 1

Has 2

Krujë 5

Tropojë 4

Pukë 3

Mirditë 2

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.