Android në 2 miliardë pajisje – Google prezanton risitë tek VR, fotot dhe asistentët

Ashtu siç pritej, konferenca vjetore e Google zbuloi plot risi që do të vijnë në produktet e gjigandit të internetit. Drejtori Ekzekutiv, Sundar Pichai e nisi prezantimin e tij me lajmin se tashmë sistemi android është aktiv në 2 miliardë pajisje në të gjithë botën.

Duke vijuar me shifra, ai tregoi se YouTube ka arritur 1 miliard përdorues, me 1 miliard orë video të para në këtë platformë. Po 1 miliard janë edhe kilometrat e përshkuara me Google Maps. Shërbimi Cloud i Google numëron 800 milionë përdorues aktivë në muaj, ndërsa Google Photos ka 500 milionë përdorues që ngarkojnë 1,2 miliardë foto të reja çdo ditë.

Më pas konferenca “I/O” vijoi me prezantimin e produkteve dhe shërbimeve të reja.

Google VR

Kështu Google futet në lojën e pajisjeve VR, por me një ndryshim të jashtëzakonshëm.

Pajisja e Google, nuk ka nevojë për një smartphone, kompjuter apo pajisje të tjera, për të ofruar realitetin virtual. Ajo ka sensorë të cilët njohin mjedisin përreth duke ofruar një eksperiencë të përmirësuar në VR. Pajisja në bashkëpunim me HTC dhe Lenovo do të jetë e disponueshme brenda fundit të vitit.

Google Home

Pak ditë pasi Amazon prezantoi një pajisje të re Echo me ekran, Google njofton risitë tek Home. Pajisja do të mund të bëjë telefonata, duke u lidhur me telefonin në shtëpi. Thirrjet drejt SHBA-së dhe Kanadasë do të jenë falas.

Google Assistant

Tashmë asistenti i Google do të ketë mundësinë të “shohë”. Ashtu si Bixby i Samsung, Google ofron aplikacionin Google Lens, i cili ka aftësinë të njohë objektin në kamera dhe të ofrojë çdo të dhënë për të. Tjetër risi për asistentin është se do të mund të shkarkohet edhe në iPhone.

Google Photos

Platforma e ruajtjes së fotove merr disa përmirësime. Një prej tyre është vetëofrimi nga aplikacioni për t’u dërguar fotot miqve, kur ata janë prezentë në pozë. Platforma do të lejojë të krijosh edhe albume me secilin të njohur, pa patur nevojë të selektosh vetë çdo foto.

Por, risia më e madhe tek Photos, është mundësia për të patur albume të printuara. Përmes aplikacionit mund të zgjedhësh fotot, t’i ndryshosh, e më pas ta dërgon të printuar tek shtëpia.

Android O

Sistemi i operimit për celularë, tabletë dhe TV tashmë mund të shkarkohet në versionin e testimit. Disa nga risitë e tij janë në lidhje me konsumin e baterisë, sigurinë e shtuar, opsionin për shkarkimin e fonteve të ndryshëm të shkrimit, leximin e njoftimeve për aplikacione individuale.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.