Anëtarësia në euro, “e përjetshme” – Issing: Dalja nga Eurozona nuk duhet të jetë tabu!

Në Janar valuta e përbashkët europiane bën 20 vjeç. Ndërkohë që afron përvjetori i krijimit të euros, një nga arkitektët e valutës, tha se dalja nga Eurozona nuk duhet të jetë më e ndaluar, nëse një vend anëtar tallet me rregullat fiskale.

Otmar Issing, një anëtar themelues i bordit ekzekutiv të Bankës Qendrore Europiane, tha për Der Tagesspiegel se euro mund të mbijetojë vetëm nëse të gjithë vendet anëtare përputhen me angazhimet e tyre.

Sipas tij, deri më tani, nuk ka ndonjë opsion që vendet të dalin nga unioni monetar dhe aksesi është konsideruar si i pakthyeshëm dhe i përjetshëm. “Nëse konfliktet bëhen ekstreme për shkak të sjelljes së keqe të një vendi, apo disa vendeve, atëherë dalja nga Eurozona nuk duhet të jetë më tabu”, tha Issing.

Ai theksoi Italinë si një nga problemet kryesore, duke thënë se jo vetëm që shkel angazhimet që ka bërë me Komisionin Europian, por  mburret me thyerjen  e paramenduar të rregullave.  Italia u gjend  në një përplasje me Brukselin në muajt e fundit mbi buxhetin 2019,  megjithatë, Komisioni Europian vendosi të mos gjobisë vendin, pasi qeveria populiste premtoi të kufizojë shpenzimet.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.