Anëtarësimi i Shqipërisë në BE, Basha: Është objektivi kryesor politik i PD-së
Opozita ka shprehur shqetësimin për përmasën e kapjes së shtetit nga krimi i organizuar, gjatë viteve të fundit, në takimin me Ministrin e Jashtëm të Gjermanisë, Heiko Maas.
Duke iu referuar kushteve të vendosura në Samitin e Sofjes, kryetari i PD-së, Lulzim Basha i konsideroi lidhjet e politikës me krimin si pengesën më të madhe për hapjen e negociatave të anëtarësimit të Shqipërisë me Bashkimin Europian, si dhe rrezik për stabilitetin e vendit.
Më tej Basha shprehu gatishmërinë e opozitës për të vazhduar të kontribuojë në zbatimin e reformës në drejtësi, bazuar në parimet e respektimit të Kushtetutës, moskapjes partiake të gjyqësorit dhe arritjes së rezultateve të prekshme në luftën kundër korrupsionit dhe krimit të organizuar.
Kreu i opozitës rikonfirmoi qëndrimin për mosndryshimin e kufijve në Ballkan dhe falënderoi Kancelaren Merkel dhe qeverinë gjermane për pozicionimin e qartë në këtë çështje.
Ndërkohë që Basha ka theksuar faktin se “Anëtarësimi i Shqipërisë në BE mbetet objektivi kryesor politik i Partisë Demokratike”.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.