Anëtarësimi në BE – Mesi: Shqipëria meriton hapjen e negociatave si rrjedhojë e reformave të ndërmarra
“Shqipëria meriton hapjen e negociatave me BE-në si rrjedhojë e reformave thelbësore të ndërmarra, si ajo e reformës në drejtësi dhe reformës në administratën publike.” Kështu, është shprehur zëvendësministrja, Senida Mesi në Konferencën Ballkanike “Drejt Samitit të BE-së për Ballkanin”, të zhvilluar sot në Podgoricë.
Sipas Mesit, përtej obligimit për rrugëtimin drejt Bashkimit Europian, reformat janë gjithashtu edhe një detyrim ndaj qytetarëve shqiptarë dhe brezave të ardhshëm.
Kjo konferencë u organizua nga Partia Socialiste Europianë në bashkëpunim me Partinë Demokratike të Socialistëve të Malit të Zi dhe Partisë Socialiste të Shqipërisë së bashku me Knut Fleckenstein, anëtar i Parlamentit Europian dhe Adnan Dibrani, anëtar i Parlamentit Suedez nga Mitrovica.
Më tej, zëvendësministrja shprehu domosdoshmërinë për forcimin e lidhjeve në fusha të ndryshme mes vendeve të Ballkanit Perëndimor, duke vënë theksin te infrastruktura dhe ndërlidhja mes njerëzve.
“Për sa i përket perspektivës së vendeve të Ballkanit Perëndimor (#WB), me të pranishmit ndava bindjen se vendet tona duhet të forcojnë lidhjet në fusha të ndryshme si infrastruktura, digjitalizimi dhe ndërlidhja mes njerëzve, si dhe të punojmë nga afër me BE-në në adresimin e sfidave të përbashkëta që shoqëritë tona po përballen.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.