Anëtari i 20 i Eurozonës – Moscovici: Bullgaria do të jetë vendi i radhës, por nuk duhet të nxitojë

Komisioneri për çështjet Ekonomike dhe Financiare, Piere Moscovici, tha se Bullgaria do të jetë anëtari i 20 i Eurozonës, por shtoi se nuk duhet të nxitojë gjatë procesit.

Vendi i ballkanit, që mban aktualisht presidencën e Bashkimit Europian, po përpiqet të adaptojë valutën e përbashkët dhe Kryeministri, Bojko Borisov, ka thënë se  Bullgaria do të hyjë në periudhën e pritjes 2-vjeçare  që quhet mekanizmi i kursit të këmbimit (ERM-2), brenda një viti.

Në një takim të ministrave të Financave në Sofje, Moscovici tha se vendi i Ballkanit duhet të mos nxitojë dhe të punojë në kriteret e adaptimit të valutës.

“Bullgaria do të jetë vendi anëtar i radhës në Eurozonë dhe nuk ka dyshim për këtë”, tha Moscovici.  Ai shtoi se Bullgaria, vendi më i varfër i Bashkimit Europian, duhet të punojë për të përafruar ekonominë me vendet e pasura të perëndimit dhe theksoi se anëtarësimi në euro do të jetë një aset dhe jo një goditje për ekonominë e vendit.  Bullgaria, që ka fiksuar levën me euro,  përputhet me kriteret formale për të adaptuar valutën, pasi ka ndërmarrë politika fiskale të matura dhe ka mbajtur inflacionin brenda objektivit.

Megjithatë, Produkti i Brendshëm Bruto për frymë, i matur me paritetin e fuqisë blerëse, ndodhet në 49% të mesatares së Bashkimit Europian, shumë poshtë mesatares së Eurozonës dhe shumë analistë fajësojnë korrupsionin që ka larguar investitorët.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.