Anëtarit të Bordit të ERE i skadon afati i emërimit – Kuvendi shpall vendin vakant. Ja kriteret
Në datë 25 prill 2018 do të përfundojë afati i emërimit në detyre për anëtarin e Bordit të Entit Rregullator të Energjisë, Abaz Aliko. Për këtë arsye, Kuvendi, i cili është institucioni përgjegjës për emërimin e anëtarëve të këtij bordi ka shpallur të hapur garën për kandidatura për këtë pozicion vakant.
Kushti për t’u emëruar në këtë detyrë janë që kandidati të jetë shtetas shqiptar, i cili të ketë jo më pak se 10 vite eksperiencë pune, nga ku 5 vite në sektorin energjetik, si edhe të jetë me profesion ekonomist.
Sekretaria pranë Zyrës së Protokollit të Kuvendit do të presë aplikimet deri më datë 26 Shkurt. Kandidatët e interesuar duhet të paraqisin deri më këtë datë dokumentat e mëposhtme:
- Kërkesë për shprehje interesi për të kandiduar për vendin vakant të shpallur
- CV- te detajuar, nr kontakti telefon, adrese email
- Fotokopje e kartës së identitetit
- Diplome universitare si ekonomist (e noterizuar)
- Librezë pune (e noterizuar)
- Çdo referencë apo kualifikim tjetër që ka lidhje me vendin vakant të shpallur
- Vërtetim të gjendjes gjyqësore që nuk ka qenë i dënuar penalisht.
- Plotësim dhe nënshkrimi i formularit vetëdeklarimi, sipas përcaktimeve të ligjit nr 138/2015 “Për Garantimin e Integritetit të Personave që Zgjidhen, Emërohen ose Ushtrojnë Funksione Publike”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.