Angjeli në “Argument”: Pse po e ndryshojmë tani buxhetin e shtetit. Ristrukturimi i ministrive reflektohet në buxhetin e vitit 2018

Deputeti i Partisë Socialiste dhe ish ministri i Financave, Anastas Angjeli, në një intervistë dhënë për emisionin “Argument” në SCAN ka folur për arsyet e rishikimit të buxhetit që do të miratohet në seancën parlamentare të javës së ardhshme.

Sipas Angjelit buxheti do të rishikohet me qëllim sigurimin e rezervave energjetike, të publikuara dhe në aktin normativ gjatë sezonit të verës. Arsyeja e dytë lidhet me mos realizimin e disa projekteve si pasojë e vitit elektoral dhe rialokimi i fondeve buxhetore në favor të projekteve me nivel të lartë eficente në realizim. Ndërsa së treti pritet që të ketë një shtesë të fondit rezervë të Kryeministrisë për të përballuar raste të paparashikuara.

“Jemi drejt përfundimit të vitit, për shkak të veçorive, nuk po them për shkak të veçorive të një kabineti gjysmë-teknikë apo të një periudhe elektorale, por sidomos për shkak të disa nevojave të domosdoshme të cilat janë edhe kërkesa të Kushtetutës, kur mund të ndryshojë buxheti me akt normativ që është nevoja dhe emergjenca. Kryesisht na imponojnë të bëjmë ndryshime dhe rregullime, duke u nisur nga disa shkaqe dhe disa arsye për të arritur disa objektiva kryesorë.

Shkaku i parë është thatësira e madhe dhe nevoja energjetike, nuk mund të mos konsiderohet si një çështje shumë serioze dhe sociale për plotësimin e nevojave të popullsisë, por edhe për ekonominë e vendit. Pikërisht duke u nisur nga gjendja e rezerva energjetike në vend, sidomos e çështjes së furnizimit me energji elektrike, qeveria iu dha autorizimin para pak kohësh kompanive të mëdha të energjisë që të merren me këtë çështje, dhe për këtë do të ketë një rialokim të fondeve me rreth 3 miliardë lekë në buxhetin e shtetit.

Për shkak të faktorëve të mësipërm që përmenda, të një viti me ndryshime teknike të qeverisë, me fushata elektorale, kemi një përdorim të buxhetit mbase jo shumë efektiv në disa projekte dhe fondet duhen rialokuar në ato projekte që japin eficencën më të madhe. Pikërisht është kjo arsyeja, për këtë qëllim dhe për plotësimin e disa nevojave të tjera në disa zëra të shpenzimeve të buxhetit do të ketë një rialokim edhe në këto zëra në buxhet. Gjithashtu është menduar që në fondin rezervë të Këshillit të Ministrave të ketë një shtesë për të përballuar problemet e paparashikuara që mund të dalin”.

I pyetur lidhur me treguesit kryesorë makroekonomikë dhe impaktin e rishikimit mbi to, Angjeli ka theksuar se deficiti buxhetor, niveli i borxhit publik dhe parashikimi i të ardhurave nuk ndryshon.

“Dhe natyrisht ka arsye dhe në të njëjtën kohë ka synime kryesore edhe pse ndryshon duke pasur parasysh 6 mujorin e parë pavarësisht se ne tani afrojmë në 9 mujor, situata makrofinanciare, makroekonomike ishte pothuajse stabël edhe në drejtim të realizimit të të ardhurave në 6 mujorin e parë por edhe në drejtim të realizimit të objektivit të rritjes ekonomike. Atëherë mund të thuhet me plotë gojë që ndryshimet janë në dobi të një menaxhimi më të mirë financiar, të financave publike, në buxhetin e shtetit dhe nuk prekin treguesit kryesorë makroekonomikë dhe makrofinanciarë. Nuk prekin as uljen e të ardhurave, as çështjen e deficitit të brendshëm dhe as çështjen e borxhit publik. Kjo është shumë e rëndësishme për vazhdimin e ruajtjes së stabilitetit financiar të vendit”.

Gjithashtu, Angjeli ka theksuar se ndryshimin e emërtimit dhe funksioneve të ministrive të qeverisë së re “Rama2” do të aplikohen jo më parë se buxheti i vitit 2018.

Gazetari Enio Civici: Përveç këtyre çështjeve ka dhe një pyetje që lidhet me krijimin e ministrive të reja me bashkimin apo eliminimin e tyre. A do të jetë kjo e reflektuar në buxhet?

“Jo kjo nuk është e reflektuar në këtë, por të jeni të sigurt që vënia në funksion, riorganizimi i ministrive padyshim që në buxhetin e vitit 2018 i cili vjen për 2 muaj do të jetë i reflektuar që nga 1 janari që ato të funksionojnë në buxhet sipas zërave dhe emërtimeve që do të kenë të gjithë institucionet e vendit sepse nuk janë vetëm ministritë, janë drejtoritë e përgjithshme, janë të gjitha”, u shpreh Angjeli.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.