Anglia, hapa drejt së panjohurës / Qeveria heq thuajse të gjitha kufizimet, ndërkohë që infektimet rriten

Mbretëria e Bashkuar po ndërmerr hapa drejt së panjohurës, me heqjen e thuajse të gjitha masave kufizuese të pandemisë, në një kohë që infektimet me koronavirus janë të larta dhe vijojnë rritjen. Nga dita e hënë nuk ka më limitë për grumbullimet në ambientet e brendshme, klubet e naftës janë rihapur, ndërsa edhe rregulli për distancë fizike 1 metër është hequr. Mbajtja e maskave do të jetë vullnetare, por disa kompani të transportit dhe fluturimeve kanë thënë se mbajtja e maskës gjatë udhëtimeve do të jetë e detyruar. Në thelb, të gjitha masat ligjore kundër përhapjes së Covid-19 janë hequr dhe janë zëvendësuar me përgjegjësitë personale, ndërkohë që infeksionet vazhdojnë rritjen. “JU lutem, tregohuni të kujdesshëm. Ta hapin vendin me gjithë maturinë dhe respektin për njerëzit e tjerë”, deklaroi kryeministri i Britanisë së Madhe, Boris Johnson, në një deklaratë për mediat të dielën në mbrëmje, përpara se masat të hynin në fuqi. Rastet e reja në të gjithë vendin vijojnë të jenë të larta, pasi të 7 ditët e fundit u raportuan mbi 316 mijë raste, në rritje me 43% krahasuar me javën paraardhëse. Megjithatë, lajmi i mirë është se shtrimet në spitale janë të ulëta, me 4,313 njerëz të shtruar në 7 ditët e fundit, ndërsa po gjatë së njëjtës periudhë 283 persona gjetën vdekjen. Pjesa më e madhe e infektimeve janë mes të rinjve që nuk janë vaksinuar akoma, ose që janë pjesërisht të mbrojtur. Në të njëjtën kohë, qeveria vijon me programin e  vaksinimit. Sipas të dhënave, 87.9% e të rriturve në Mbretërinë e Bashkuar kanë marrë dozën e parë të vaksinës dhe 68.3% i kanë marrë të dyja dozat.

Lidion Kulla – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.