Anija e ngarkuar me qymyr rus ankorohet në portin verior të Spanjës!
Një anije me flamur maltez që transportonte qymyr rus dhe koks nafte është ankoruar në portin verior spanjoll të Gijonit, thanë autoritetet portuale të hënën. Një tjetër anije me flamur maltez, e ngarkuar me naftë ruse, u ankorua në Kartagjenë, në jug të Spanjës, të premten, konfirmuan autoritetet.
Bashkimi Europian miratoi sanksione kundër importeve të qymyrit, drurit, kimikateve dhe produkteve të tjera si vodka nga Rusia më 8 prill në një përpjekje për të shkurtuar tregtinë pas pushtimit të Ukrainës nga Moska, megjithëse sanksionet ende nuk janë zbatuar plotësisht.
Më 27 prill, një tjetër anije me flamur maltez u përpoq të hynte në portin e Barcelonës, por iu mohua hyrja sepse po transportonte ngarkesa të transferuara nga një anije ruse nën sanksione, tha në një deklaratë në atë kohë Ministria e Transportit e Spanjës.
Një zëdhënës në ministrinë spanjolle nuk ishte në gjendje t’i përgjigjej menjëherë një kërkese për koment nga mediat. RTS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.