Ankandi për parqet eolike / Kompanitë do kenë 1 vit kohë për dorëzimin e dokumenteve dhe ofertës financiare
Investitorët që janë të interesuar për të marrë pjesë na ankandin e hapur nga Ministria e Infrastrukturës dhe Energjisë për ndërtimin e impianteve eolike do të kenë 1 vit kohë për dorëzimin e ofertave të tyre. Ky dikaster ka publikuar të gjitha informacionet e nevojshme, ku specifikohet se afati i fundit për dorëzimin e aplikimeve për kualifikim është data 13 qershor 2022.
Më herët, ministria ka bërë me dije se përgatitja e propozimeve për ndërtimin e centraleve të prodhimit të energjisë nga era kërkon kohë në dispozicion, por këto afate tregojnë se të paktën deri në fund të vitit 2022 ndërtimi i këtyre impianteve nuk o të ketë nisur. Kjo për shkak të procedurave të shqyrtimit të dokumentacionit, shqyrtimit të ofertës financiare si dhe pajisjes me dokumentet dhe lejet e nevojshme për nisjen e punës në terren. Ankandi hibrid për ndërtimin e parqeve të prodhimit të energjisë nga era u hap në datën 21 qershor të këtij viti, ndërkohë që çmimi tavan do të jetë 75 euro/MW. Pjesëmarrja në këtë proces konkurrues lejohet vetëm për projekte me një kapacitet minimal prej 10 MË dhe kapacitet maksimal prej 75 MË. Ndërkohë që, nëpërmjet këtij procesi konkurrues MIE do të përzgjedhë Projekte më një kapacitet të përgjithshëm prej 100 MË të cilët do të përfitojnë masat mbështetëse për blerjen e energjisë. Megjithatë, autoriteti Kontraktues, më vonë mund të vendosë që të rrisë kapacitetin total të tenderuar deri në 150 MË. Forma e ankandit hibrid që nuk është aplikuar deri më tani, ndërsa nënkupton se shteti nuk do të angazhohet me vendosjen e tokës në dispozicion të investitorëve, por do jenë këta të fundit që do të ofrojnë të gjithë paketën e investimit, duke nisur nga toka, investimi financiar e deri tek operimi.
Ola Mitre – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.