Ankesa për tenderin e bursës së energjisë – Komisioni i Prokurimit s’ka marrë ende vendimin, të tjera vonesa për ngritjen e platformës

Pavarësisht se kanë kaluar gati 45 ditë nga depozitimi i ankesës, Komisioni i Prokurimit Publik nuk ka marrë ende një vendim për tenderin e ngritjes së bursës së energjisë, duke shkaktuar vonesa të mëtejshme në ngritjen e këtij instrumenti të rëndësishëm pë sektroin elektroenergjetik.

Sipas legjislacionit  në fuqi, si rregull afati për marrjen e vendimit nuk duhet të tejkalojë 33 ditë. Por, ai mund tw shtyhen nw rast se Komisioni i Prokurimit Publik ka nevojë të kërkojë ekspertizë nga palë të treta ose të kryejë verifikime pranë organeve të tjera. Ngritja e bursës së energjisë nënkupton listimin e prodhuesve të energjisë elektrike, çka do të rrisë konkurrencën si dhe do të lehtësojë blerjen e energjisë nga të gjithë bizneset e liberalizur që sigurojnë vetë sasinë e nevojshme të energjisë.

Paralelisht, ndonëse është tejkaluar çdo afat, tashmë institucionet kanë deklaruar se shumë shpejt do të nisë edhe dalja në treg të lirë e bizneve të lidhur në tensionint 20 KV, të cilët përbëjnë një numër të konsdiderueshëm të abonentëve. Tenderi për ngritjen e bursës së energjisë përfundoi në KPP, pas një ankese të bërë nga kompania sllovake “Sfera”, që pretendon se kërkesat e tenderit janë diskriminuese dhe në kundërshtim me legjislacionin shqiptar, duke përfshirë Kushtetuën e Shqipërisë, Traktatin e Komunitetit të Energjsë dhe ligjin shqiptar “Për prokurimin publik”.

Sipas ankesës së depozituar në KPP, teksa rendit një sërë prej kërkesave që duhet të përmbushin kompanitë sipas dokumenteve të tenderit “Sfera” beson se ato kanë karakter diskriminues dhe efekt të mbylljes së tregut, pasi përjashtojnë pa ndonjë justifikim të arsyeshëm, shumicën e ofertuesve të mundshëm të shërbimeve që kanë kapacitetin e nevojshëm teknik dhe menaxherial dhe mund të menaxhojnë me efikasitet funksionimin e përditshëm të segmenteve të tregut të organizur njëditore dhe intraday në Shqipëri dhe Kosovë dhe bashkimin e tyre.

Teksa ka paraqitur edhe argumentet mbi shkeljet e pretenduara, ajo i ka kërkuar Komisionit të Prokurimit Publik dhe Autoritetit Kontraktues të modifikojnë kriteret e përzgjedhjes, duke hequr disa prej kërkesave të vendosur. Sipas deklaratave të autortieteve, bursa do të ishte funskionale në 3-mujorin e parë të këtij viti, por ngritja e këtij instrumenti të rëndësishëm po pasohet nga vonesa të njëpasnjëshme.

Ola Mitre/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.