Ankesa për tenderin e teatrit. Komisioni i Prokurimit “rrëzon” kompaninë, lejon bashkinë të vazhdojë procedurat

Komisioni i Prokurimit Publik nuk ka pranuar ankesën e kompanisë Gjeo Konsult & Co për tenderin e studimit dhe projektimit të teatrit të ri të Tiranës. Ankesa u dorëzua në datën 14 shtator, ndërkohë që organi më i lartë të fushën e  prokurimeve ka vendosur të lejojë Bashkinë e Tiranës të vijojë me procedurat  tenderuese. Sipas Komisonit të Prokurimit, kompania nuk ka zbatuar afatet ligjore që parashikohen për të paraqitur ankesë e për pasojë ky organ nuk mund të shqyrtojë çështjen.

Gjeo Konsult & Co iu drejtua komisionit, pas një ankese dërguar në Bashkisë së Tiranës si autoritet kontraktor, ku kundërshtonte vendimin e Komisionit të Vlerësimit të Ofertave, lidhur me vlerësimin me pikë të ofertës së tij  teknike. Po ashtu, kompania, kërkonte vënien në dispozicion  të  procesverbalit  të  vlerësmit të ofertave teknike, por edhe komisioni i ankesave, ngritur pranë bashkisë nuk e ka pranuar ankesën me argumentin e shklejes së afateve ligjore për depozitimin e saj. Megjithatë, sipas legjislacionit në fuqi, kompania ka të drejtë t’i drejtohet edhe Gjykatës Administrative të Shkallës së Parë për të kundërshtuar vendimin e Komisionit të Prokurimit Publik. Tenderi për studim-projektimin e Teatrit të ri u hap në datën 3 korrik, teksa koha e lënë në dispozicion për kompanitë e interesuara për të marrë pjesë në garë ishte vetëm 11 ditë. Fondi limit i vënë në dispozicion për këtë shërbim është 60.3 mln lekë, ndërkohë që hapja e tenderit erdhi pas prishjes së bujshme të Tetarit Kombëar, teksa i gjithë vendi ishte në karantinë për shkak të COVID-19.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.