Ankesat për furnizimin me energji – ERE, detyrime kompanive për shërbimin cilësor. Gjoba, në rast se nuk zbatohen

Furnizuesit e energjisë elektrike do të duhet të përmbushin një sërë kriteresh, me qëllim ofrimin e shërbimit cilësor ndaj klientëve. Enti Rregullator i Energjisë ka hartuar për herë të parë një rregulloren për arritjen e treguesve të matjes dhe vlerësimit të performancës së shërbimit ndaj klientit, të cilës do t’i nënshtrohen të gjithë furnizuesit e licencuar, përfshirë kompaninë publike. Ndërkohë që, përpara miratimit përfundimtar, rregullorja do të nxirret në konsultim publik me palët e interesit.

Referuar dokumentit, çdo furnizues do të ketë detyrimin të informojë klientët për të drejtat dhe kushtet me të cilat do të furnizohet, mbi çmimet e furnizimit me energji elektrike për periudhën e ofruar apo mbi të drejtën që klientët kanë për të përzgjedhur një furnizues tjerë. Gjithashtu, rregullorja përcakton kanalet ku duhet të shpërndahet ky informacion, si dhe të zhvillojë anketa për marrjen e komenteve nga klientët për shërbimin e ofruar.

Ndërkaq, përveç vendosjes së standardeve që furnizuesit duhet të përmbushin për një shërbim cilësor, draft-rregullorja parashikon edhe të drejtën e monitorimit të këtyre treguesve, nga Enti Rregullator i Energjisë, si dhe vendosjen e gjobave në rast të mosrespektimit të tyre. Sipas draft-rregullores performanca e furnizuesit në cilësinë e shërbimit do të konsiderohet: E mirë nëse ka më pak se 3% të totalit të klientëve që kanë ushtruar ankim në lidhje me keqfaturimin; E kënaqshme, nëse ky tregues është 3% dhe jo e mirë nëse ai arrin në mbi 3%.

Paralelisht ERE do të vlerësojë edhe performancën e furnizuesve në drejtim të trajtimin të këtyre ankesave. Miratimi i kësaj rregulloreje është tejet i rëndësishëm, pasi përveç klientëve të lidhur në tensionin 35 KV, të cilat tashmë kanë dalë në treg të lirë energjie, pritet edhe dalja e klientëve në 20 KV, që kanë edhe më të konsiderueshëm në numër e që do të duhet të përzgjedhin vetë furnizuesin e tyre të energjisë, duke nënshkruar kontrata individuale mes tyre, ku ndër të tjera përcaktohet edhe çmimi me të cilin do të blejnë energjinë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.