Ankesat për prokurimet publike dhe koncesionet – AKSHI shpall tenderin për krijimin e sistemit online/ Fondi dhe detajet
Agjencia Kombëtare e Shoqërisë së Informacionit ka shpallur një tender me fond 175.5 milionë lekë. Tenderi konsiston në ngritjen e një sistemi elektronik, për menaxhimin e ankesave, drejtuar Komisionit të Prokurimit Publik.
“Objektivi i përgjithshëm i këtij projekti është ndërtimi i një sistemi elektronik për dorëzimin e ankesave dhe menaxhimin e tyre pranë Komisionit të Prokurimit Publik në lidhje me procedurat e prokurimit publik, koncesionet dhe partneritetin publik privat, ankandet dhe lejet minerare, si dhe përmirësimin e infrastrukturës për suportin e sistemit dhe infrastrukturës së punës në zyrat e KPP me anë të një sistemi të qendërzuar” specifikohet në dokumentacionin bashkangjitur tenderit.
Referuar të dhënave të projektit të bashkangjitur në Agjencinë e Prokurimit Publik, shërbimet do të zhvillohen në portalin e- Albania, për dorëzimin e mëtejshëm të ankesave pranë Komisionit të Prokurimit Publik.
Tenderi do të qëndrojë i hapur deri më 8 shkurt, ora 14:00, ndërsa ka një afat kohor për ekzekutim prej 12 muajsh, që nga nënshkrimi i kontratës me subjektin fitues.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.