Anketa/Si e shikojnë bizneset gjermane situatën ekonomike në Shqipëri! Çfarë parashikojnë për të ardhurat, investimet e numrin e punonjësve
Bizneset gjermane duket se kanë pak pritshmëri për situatën ekonomike të vitit 2019. Referuar anketimit të kryer në kuadrin e projektit të përbashkët të Dhomave Gjermane të Tregtisë në Europën Qendrore dhe atë Lindore, rezulton se sa i përket situatës aktuale ekonomike për Shqipërinë, 51 % e tyre e mendojnë keq, 36 % e mendojnë kënaqshëm ndërsa vetëm 13 % e mendojnë mirë.
Ajo që vihet re është se ka një shtim të pesimizmit të bizneseve krahasuar me një vit më parë ku 39 % e mendonin keq situatën ekonomike, 42 % e shikonin kënaqshëm dhe vetëm 19 % e mendonin mirë. Megjithatë, duhet evidentuar se ky pesimizëm nuk është më i lartë se në vitin 2014 apo në vitin 2016.
Sa i përket pritshmërive për situatën ekonomike, anketimi ka dalë në konkluzionin se 45 % e bizneseve e shohin të pandryshuar. Ndërkohë, 43 % e mendojnë më keq dhe vetëm 13 % e mendojnë më mirë.
Krahasuar me një vit më parë (2018), ka një rritje të ndjeshme në përqindje të bizneseve që situatën ekonomike e presin më keq. Në vitin 2018, vetëm 17% e bizneseve parashikonin se situata ekonomike do të ishte më keq, ndërsa 47% e mendonin të pandryshuar.
Sa i përket pritshmërisë së të ardhurave, këtë vit janë 38 % e bizneseve që mendojnë se ato do të rriten, ndërkohë 40 % mendojnë se ato do të jenë të pandryshuara ndërsa 22 % mendojnë se do të bien.
Krahasuar me një vit më parë, konstatohet një rënie e përqindjes së bizneseve që kanë pritshmëri për rritjen e të ardhurave. Në vitin 2018, 56 % e bizneseve mendonin se do të kishin një rritje të të ardhurave.
Sa i përket zhvillimit të parashikuar të numrit të punonjësve, shumica e bizneseve është shprehur se nuk do të ketë ndryshime në numër. 59 % e bizneseve janë shprehur se numri do të mbetet i pandryshuar, 17 % se do të bien ndërsa 24 % se do të rritet.
Sa i përket ecurisë së investimeve kapitale, 43% e bizneseve janë shprehur se gjatë vitit 2019 ato do ët mbeten të pandryshuara, 30 % janë shprehur se ato do të bien ndërsa 26 % se do të rriten.
Në vitin 2018, ishin 50 % e bizneseve që u shprehen se investimet do të rriteshin dhe vetëm 11 5 se ato do të binin.
Elisabeta Dosku/k.k/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.