Aplikimet për fondin 20 mln euro – Skemat në bujqësi, për dy javë shfaqin interes 3500 fermerë
Për 2 javë, rreth 3500 fermerë kanë aplikuar për të përfituar fonde nga Skemat Kombëtare e financimit të bujqësisë, ku për këtë vit janë vënë në dispozicion 20 milion euro.
Vetëm ditën e parë të hapjes së aplikimeve për financimet në bujqësi, kanë shfaqur interes rreth 400 fermerë, ndërkohë që deri në fund të afatit që është 28 Marsi, Agjencia për Zhvillimin Bujqësor dhe Rural ka parashikuar të bëhen rreth 15 mijë aplikime.
Ndër problematikat e hasura në terren është mungesa e certifikatës së pronësisë mbi token, pasi procesi i aplikimit është i thjeshtë dhe fermerët kanë asistencën e punonjësve në drejtoritë rajonale të bujqësisë.
Janë 52 skema ku fermerët kanë mundësi të aplikojnë për financim dhe do të mbështeten 8 sektorë të ndryshëm. Në fazën e aplikimeve, fermerët nuk kanë nevojë për dokumente pasi gjithçka bëhet me vetëdeklarim.
Fermerë potencialë për të përfituar që disponojnë një nipt, që është edhe kriteri kryesor për përfitim, janë 38 mijë në shkallë vendi. Ndërkohë që për ata që kanë toka të parcelizuara, përpos mundësisë për tu grupuar në Shoqëri të Bashkëpunimit Bujqësor, mund të bashkohen edhe përmes një kontrate noteriale.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.