Aplikimet për punë në Gjermani – Numri në rritje, janë 150 mijë vende deri në 2020

Rritet numri i të rinjve të cilët aplikojnë për punësim jashtë vendit kjo sipas agjencive  të punësimit vjen si rezultat i ofrimit të  kushteve më të mira të punës dhe pagave më të larta.

Sipas menaxheres së njërës prej agjencive të punësimit në Gjermani Imelda Bregasi, numri i aplikimeve në këtë agjenci në total ka arritur në 400 ku 150 aplikime janë bërë vetëm në tre mujorin e parë të  2017-ës.

Sipas përfaqësuesve të agjencive mosha mesatare e aplikantëve është 30 vjeç.

“Aktualisht në sistemin tonë, ne numërojmë rreth 400 persona, të cilët kanë bërë aplikime pranë zyrës tonë, përsa i përket periudhës 2016-2017.  Vetëm tremujori i parë i 2017-s numërohen rreth 150 aplikantë të rijnë, në profesionet e infermierisë, mjekësisë dhe të inxhinierisë. Por kemi edhe një database përsa i përket profesioneve të dyta, të cilat janë profesionet e hidraulikës, mekanikut, elektricistit, apo punonjësve të hotelerisë”, deklaroi Imelda Bregasi, menaxhere e zyrës së punësimit në Gjermani.

Sipas Bregasit inferemierë dhe inxhinierë janë kategoritë ku kërkesa është më e lartë për tregun Gjerman, ndërkohë që pagat kapin shifrat nga 3000 deri në 4000 euro.

“Tregu gjerman ka një nevojë vërtet në rritje, përsa i përket profesionit të infermiereve, fizioterapisë, të mamive, të pjesës së mjekëve”.

Shteti gjerman vetëm në sektorin e shëndetësisë deri në 2020 kërkon të punësojë 150 mijë punonjës shëndetësie.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.