Apple “bie” përpara iPhone X – Shqetëson kërkesa për produktet e reja, e Hëna “godet” teknologjinë
Aksionet e gjigantit të teknologjisë, Apple, ranë gjatë sesionit të parë tregtar të javës në SHBA, duke shtuar shqetësimet e një korrigjimi të çmimit, pas një raporti se kompania i ka thënë furnitorëve që të reduktojnë dërgesat e pjesëve për iPhone X.
Sipas raportimeve, furnitorët e Apple do të dërgojnë vetëm 40% të komponentëve që janë porositur fillimisht për produktin premium, që do të futet në treg në fillim të Nëntorit.
Kjo bëri që investitorët në Wall Street të shqetësohen mbi kërkesën për aparatin e ri të Apple, pas lançimit ditën e Premte të iPhone 8, një model më i lirë se iPhone X, që tërhoqi më pak njerëz krahasuar me produktet paraardhëse.
Disa investitorë argumentuan se debutimi i dobët i iPhone 8 tregon se klientët po kursehen për daljen në treg të iPhone X, që do të ketë një çmim prej 999 dollarë. Aksionet e Apple ranë me 1.8% në fillim të sesionit.
Javën e kaluar, vlera në treg e Apple humbi 5%, duke përbërë javën më të dobët për këtë vit. Dita e parë e tregtisë në SHBA solli rënie të pjerrët për të gjithë sektorin e teknologjisë.
Sipas indeksit të miliarderëve të Bloomberg, ikonat e teknologjisë humbën një vlerë prej 15.5 miliardë dollarë nga pasuria e tyre.
Mark Zuckerberg pati humbjen më të madhe me 3.2 miliardë dollarë, ndjekur nga lideri i Alibaba, Jack Ma me 1.3 miliardë dhe Jeff Bezos i Amazon që humbi 1.2 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.