Apple, me alternativë ndaj Samsung – LG Display pritet të bëhet furnitori i dytë i ekraneve OLED

Apple do të ketë së shpejti një furnitor të dytë për ekranet OLED që përdoren në iPhone,  sipas burimeve me njohuri  për çështjen,  gjë që pritet të reduktojë kostot e prodhimit dhe varësinë nga Samsung. Gjiganti korean LG Display do të furnizojë fillimisht 2-4 milionë njësi, që është shifër e ulët në raport me shitjet e Apple. Kjo do të ndihmojë Apple në politikat e vendosjes së çmimit përballë konkurrentit Samsung, që është furnitori i vetëm për ekranet OLED të iPhone X dhe rivali kryesor për smartphone.

Kjo është arsyeja kryesore që çmimi i iPhone X nis në 1,000 dollarë dhe shitjet kanë dështuar të arrijnë projeksionet. Një marrëveshje e suksesshme për furnizimin do të ndihmonte të dy kompanitë. Apple do të mund të blinte sasi të mëdha nga LG për modelin e vitit të ardhshëm të iPhone, për t’i bërë ballë rënies së shitjeve. LG nga ana tjetër, kërkon një burim të ri të të ardhurave, ndërkohë që çmimi i ekraneve LCD ka rënë.

Sipas burimeve, ekranet e para OLED të LG, do të përdoren në një nga modelet e reja të iPhone që pritet të dalë më vonë gjatë vitit. Apple planifikon të prezantojë 3 modele të reja këtë vit, përfshirë 2 me ekrane OLED.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.