Apple në gjyq kundër komisioneres së BE-së – Në një betejë rekord prej 13 miliardë euro
Që nga 2016, si Apple ashtu edhe Irlanda kanë mohuar meritat e kthimit të taksave të Bashkimit Europian. Beteja 13 miliardë eurosh e Apple Inc. me Bashkimin Europian do të mbërrij në gjykatat e bllokut muajin e ardhshëm në një seancë dëgjimore e cila do të fokusoj në qendër të vëmendjes masën e ndërmarrë nga komisionerja antitrust, Margrethe Vestager, për marrëveshjet e taksave të bëra për kompanitë e mëdha.
Gjykata e Përgjithshme e BE-së, gjykata e saj e dytë më e lartë, do të dëgjojë argumente në sfidat e prodhuesit të iPhone dhe Irlandës për dy ditë të përcaktuara për 17-18 shtator.
Komisioni Europian në Gusht 2016 urdhëroi Irlandën të rimbursojë shumën rekord plus interesin, duke thënë se kompanisë më të pasur në botë iu dha një avantazh i padrejtë. Vendimi i BE-së pati pasoja në të gjithë Atlantikun, duke shkaktuar kritika nga Thesari i SHBA-së mbi faktin që BE po e bënte veten një “autoritet tatimor mbi-kombëtar” gjë që mund të kërcënonte përpjekjet globale për reformën e taksave.
Qeveria irlandeze tha në një email se “nuk pajtohet thellësisht” me vendimin e BE-së dhe “po angazhohet plotësisht me procesin dhe po siguron prezantimin më të mirë të pozitës së shtetit”.
Në nëntor 2017, Apple lëshoi faktet e mëposhtme në lidhje me pagesat e taksave të kompanisë:
Apple beson se çdo kompani ka një përgjegjësi të paguajë taksat e saja, dhe si tatimpaguesi më i madh në botë, Apple paguan çdo dollar që detyrohet në çdo vend të botës. Ne jemi krenarë për kontributet ekonomike që u bëjmë vendeve dhe komuniteteve ku bëjmë biznes.
Ne po paraqesim faktet si përgjigje ndaj raportimit nga Konsorciumi Ndërkombëtar i Gazetarëve Investigativ. Ndër pasaktësitë në këto raporte evidentojmë:
- Ndryshimet që Apple bëri në strukturën e saj të korporatës në vitin 2015 u krijuan posaçërisht për të ruajtur pagesat e taksave të saj në Shtetet e Bashkuara, për të mos ulur taksat e tij kudo tjetër. Asnjë operacion apo investim nuk u zhvendos nga Irlanda.
- Larg të qenit “i paprekur nga Shtetet e Bashkuara”, Apple paguan miliarda dollarë në taksa në SHBA me normën ligjore prej 35% të të ardhurave nga investimet nga paratë e saj jashtë shtetit.
- Shkalla efektive e taksave të Apple për të ardhurat e huaja është 21%, një shifër e llogaritur lehtësisht nga regjistrimet publike. Kjo normë ka qenë e qëndrueshme për shumë vite. (Bloomberg)
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.