Arben Kashahu për ’60 minuta’: Reforma Zgjedhore ende nuk është bërë, integrimi në BE ka si kusht zgjedhjet e ndershme
Në studion e ’60 minuta’ u diskutua sot mbi temën aktuale të procesit të integrimit të Shqipërisë në Bashkimin Evropian. Të ftuar ishin Senida Mesi, ish zv. Kryeministre e Shqipërisë, Arben Kashahu, sekretar për marrëdhëniet me jashtë në Partinë Demokratike dhe Gledis Gjipali, ekspert nga Lëvizja Evropiane.
Arben Kashahu është shprehur se mbledhja e sotshme e Këshillit Kombëtar të Integrimit ka qenë një show politik dhe që nuk prodhoi asgjë veçse një tabelë me 15 rekomandime. “Sot i thuhet shqiptarëve me fjalë që punojmë për integrimin në BE, ndërsa nesër i mohojnë shqiptarëve futjen në Evropë me vepra.”
Mbi rekomandimet, Kashahu ka thënë se edhe reforma zgjedhore ende është e pabërë, pasi në tryezë janë dakordësuar thjesht disa çështje, por reforma në thelb është ende e paplotë. “Qeveria tranzitore është një propozim që ende mbetet në tavolinë, në pritje të një marrëveshje. Qeveria tranzitore është kusht për zgjedhje të ndershme”
Eksperti Gledis Gjipali është shprehur se çështjet zgjedhore dhe krimi i organizuar janë vuajtja e madhe e Shqipërisë që vazhdimisht do të pengojnë integrimin në BE. “Për çështje teknike ndërhyrja e ambasadorëve jo domosdoshmërisht e ndihmon procesin. Duhet vullnet politik i përbashkët i klasës së udhëheqësve për të kompletuar rekomandimet dhe t’u integruar në BE.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.