Arben Malaj për Argument: “Problemi me borxhin publik është që nuk po ushqen ekonominë. Ka mungesë vizioni”
Sot në emisionin “Argument” nga Enio Civici u diskutua për buxhetin e vitit 2021 dhe raportin e fundit të Bankës Botërore për Shqipërinë. I ftuar me lidhje Skype, ishte ish Ministri i Financave, Z. Arben Malaj.
Sa i përket buxhetit për 2021, Z. Malaj është shprehur se përveç numrave, buxheti është dhe çështje politikash, për të harmonizuar rritjen ekonomike të vendit.
“Shqetësimi kryesor lidhur me këtë është që buxheti i ri parashikon një rritje pesimiste të ekonomisë, krahasimisht me parashikimet e mëparshme. Shqipëria ka nivel të pabesueshëm të ulët të ushqyerjes së ekonomisë, çka mund të jetë një problem për rritjen ekonomike. Duhen politika më agresive buxhetore për të përballur problematikat makroekonomike“, është shprehur Z.Malaj.
Tjetër problem, i paraqitur dhe nga raporti i BB, është niveli i papunësisë që pritet të shtohet prej pandemisë. Sipas Z.Malaj për këtë problem duhet bërë më shumë, jo thjesht mbështetje me pagë për të papunët, por mbështetje me politika punësimi. “Ka mungesë vizioni në këtë drejtim”, ka thënë ish Ministri i Financave. “Nëse s’merren masa, do rritet dhe papunësia dhe varfëria”.
Për investimet publike, Z.Malaj ka thënë që shifra e parashikuar prej 7.3% është e fryrë prej rindërtimit, megjithatë niveli normal nuk e kalon 5%, çka është i pamjaftueshëm për vendin tonë.
Për borxhin publik të rritur, Z.Malaj ka thënë se është normale që ai të shtohet, por problemi qëndron tek fakti se ku shpërndahen paratë e marra borxh. “Ato nuk shkojnë për të ushqyer likuiditetin e ekonomisë. Duhet motivuar biznesi dhe individi nëpërmjet hedhjes së parave në ekonomi. Për më tepër, shtimi i borxhit publik, duhet të shoqërohet me shtimin e përgjegjësisë së qeverisë. Fakti që paratë e marra borxh nuk po shkojnë aty ku duhet, tregon se përgjegjësi nuk ka”, përfundon z.Malaj.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.